Türkiyənin müdafiə və aerokosmik sənayesinin alıcılığında Azərbaycan 3-cü yerdədir.

0

Son illər Türkiyənin müdafiə sənayesi sektorunun sürətli inkişafı, ölkənin terrorla mübarizədə və daxili təhlükəsizlik əməliyyatlarında istifadə etdiyi milli silahlar dünyada qardaş ölkədə istehsal olunan hərbi texnikaya marağı artırıb. Belə ki, cari ilin 11 ayında 2 milyard 793 milyon 974 min ABŞ dolları məbləğində gəlirlə Türkiyənin müdafiə və aerokosmik sənayesi yeni ixrac rekorduna imza atıb.

İctimairey.az xəbər verir ki, bu barədə Türkiyə İxracat Məclisi (TİM) məlumat yayıb.

Ölkənin müdafiə sənayesi sektorunun milli məhsulların satışından əldə etdiyi gəlir 2018-ci ildə 2 milyard 35 milyon 956 min, 2019-cu ildə isə 34,6 faiz artımla 2 milyard 740 milyon 988 min dollar təşkil edib. Bu rəqəm o dövrdə ölkənin müdafiə və aerokosmik sənayenin ixrac rekordu kimi qeydə alınıb.

COVID-19 pandemiyasının təsiri ilə sektorun ixracat gəliri 2020-ci ildə 16,8 faiz azalaraq 2 milyard 279 milyon 27 min dollar təşkil etsə də, bu rəqəm cari ilin 11 ayında rekordu yeniləyərək 2 milyard 793 milyon 974 min dollar olub.

TİM-in məlumatında bu ilin yanvar-noyabr ayları ərzində Türkiyənin milli hərbi texnikasının ixrac edildiyi ilk 20 ölkənin adı sadalanır. Siyahıda sıralamaya görə ABŞ, Azərbaycan, Qətər, Birləşmiş Ərəb Əmirlikləri, Almaniya, Ukrayna, Efiopiya, Mərakeş, Fransa, Tunis, Banqladeş, Birləşmiş Krallıq, Hindistan, Türkmənistan, Çin, Özbəkistan, Ruanda, Hollandiya, İordaniya və Kanada yer alır.

Loading

Leave A Reply

Your email address will not be published.

Tərcümə »