ABŞ “Boeing”ə 4 milyardlıq hərbi sifariş verdi

ABŞ Hərbi Hava Qüvvələri “Boeing Co” şirkətinə 2,4 milyard dollarlıq daha bir sifariş verib.

Musavat.com “Defense news”a istinadən xəbər verir ki, şirkətlə imzalanmış müqaviləyə əsasən, ABŞŞ HHQ 15 KC-46 “Pegasus” tanker təyyarəsi alacaq.

Bu təyyarələr 2028-ci ilin iyun ayının sonuna qədər hazır olmalıdır. Əvvəllər Hərbi Hava Qüvvələri “Boeing”dən 89 “KC-46 Pegasus” alıb, ümumilikdə bu modeldən 179 təyyarə almağı planlaşdırır.

Nəşr xatırladır ki, bu təyyarə tanker təyyarələrinin köhnəlmiş modellərini istismardan çıxaran və onun imkanlarını modernləşdirən Hərbi Hava Qüvvələri üçün getdikcə daha mühüm rol oynayır. Oktyabr ayında yeni “KC-46 Pegasus”lardan Hərbi Hava Qüvvələrinin bölmələrinin Yaxın Şərqə yerləşdirilməsi zamanı uğurla istifadə olunub.

ABŞ Hərbi Hava Qüvvələri 2030-cu illərdə gizli texnologiyadan istifadə edilməklə tikiləcək və mübahisəli, təhlükəli hava məkanında fəaliyyət göstərə biləcək yeni nəsil tanker təyyarəsi istehsal etməyi planlaşdırır.

Bundan əlavə, “Boeing Co” 7 “P-8A Poseidon” sualtı patrul təyyarəsi üçün Hərbi Dəniz Qüvvələrindən daha 1,7 milyard dollarlıq müqavilə alıb. Bu təyyarələr ABŞ, İngiltərə, Avstraliya, Norveç, Yeni Zelandiyada xidmətdədir, Cənubi Koreya, Almaniya və Kanada tərəfindən də sifariş olunub. Dünyada təxminən 170 “P-8A Poseidon” xidmətdədir.