Ukraynada müharibə: TƏCİLİ: Rusiya Odessa vilayətinə raket zərbələri endirdi. 18 nəfər ölüb

Ukrayna rəsmiləri bildiriblər ki, Rusiyanın Ukraynanın cənubundakı Odessa vilayətinə gecə vaxtı raket zərbələri endirməsi nəticəsində biri uşaq olmaqla, azı 18 nəfər ölüb.

Fövqəladə Hallar üzrə Dövlət Xidməti (FHN) Serqeevka kəndində doqquzmərtəbəli evə bir raketin düşməsi nəticəsində 16 nəfərin öldüyü, 30 nəfərin yaralandığı barədə məlumat yayıb.

Kəndin istirahət mərkəzinə ayrıca zərbə endirilməsi nəticəsində biri uşaq olmaqla, daha iki nəfər ölüb.

Son bir neçə gündə Rusiya Ukrayna şəhərlərinə onlarla raket zərbəsi endirib.

Ukrayna FHN-i bildirib ki, raketlər cümə günü yerli vaxtla saat 01:00 radələrində (cümə axşamı saat 22:00) Sergeevkaya düşüb.

O, yanğınsöndürənlərin doqquz mərtəbəli binanın dağıntıları arasında sağ qalanları axtardığını əks etdirən görüntüləri yayımlayıb.

Odessa Regional Dövlət Administrasiyasının nümayəndəsi Sergey Bratçuk bildirib ki, raketlər Qara dəniz üzərində Rusiya hərbi təyyarələrindən buraxılıb.

Onun sözlərinə görə, gecə zərbələrində sovet Kh-22 raketlərindən istifadə edilib.

Moskva hələlik ictimaiyyətə açıqlama verməyib.

Ukrayna Rusiya qoşunlarının cümə axşamı strateji əhəmiyyətli İlan adasından çıxarılmasının Odessa limanı və daha geniş region üçün təhlükəni azaldacağına ümid edirdi.