Borrell bu sözlərinə görə üzr istədi

Avropa Birliyinin baş diplomatı Jozep Borrell Avropanı bağa, dünyanın qalan hissəsini isə cəngəlliyə bənzətdiyinə görə üzr istəyib.

Axar.az xəbər verir ki, bu barədə məlumat AB-nin saytında dərc olunub.

“Bəziləri bu metaforanı müstəmləkə avrosentrizminin təzahürü kimi yanlış şərh etdi. Əgər bu, kiməsə təsir edib, incidibsə, üzr istəyirəm”,- Borrell söyləyib.

O, “cəngəllik” sözü ilə nə demək istədiyini də açıqlayıb:

“Təəssüf ki, bu gün yaşadığımız dünya getdikcə daha çox cəngəlliyə çevrilir. Çünki dünyanın bir çox yerində güclülər ümumi qəbul edilmiş beynəlxalq normaları pozur. Bu tendensiya hamını, o cümlədən avropalıları narahat edir. Bu qanunsuzluq və nizamsızlıq dünyasının böyüməsi – mən cəngəllik haqqında deyəndə bunu nəzərdə tuturdum. Mənim cəngəlliyə istinadımda irqçi, mədəni və coğrafi çalar yoxdur. Təəssüf ki, cəngəllik hər yerdədir, o cümlədən bu gün Ukraynada”.