“Azərsu” Şuşada su anbarı yaradır
Azərsu ASC Şuşada əhalinin suya tələblərinin ödənilməsi üçün iki mənbədən su verir.
Bunu Report-a açıqlamasında Azərsu ASC-nin Planlaşdırma və layihələndirmə departamentinin rəis müavini Ceyhun Məmmədov bildirib.
Onun sözlərinə görə, bu mənbələrdən biri Zarıslı, digəri isə Kirs su mənbələrindən su ilə təmin edilir:
“Hazırda Şuşada davam edən abadlıq-quruculuq işlərini nəzərə aldıqda, orada əlavə su tələbatı yaranır. Yay aylarında əlavə su tələbatını qarşılamaq üçün “Azərsu” Şuşa şəhərində müvəqqəti su anbarının yaradır və ən qısa zamanda nasos stansiyası inşa edərək Şuşaya əlavə su gətiriləcək”.
O bildirib ki, bu su anbarı Zarıslı çayının üzərində qurulacaq ki, bu, Şuşanın dayanıqlı su təminatına böyük töhfə verəcək.
C. Məmmədovun fikrincə, ötən il Ağdam rayonunda su mənbəyinin müəyyən olunması ilə bağlı tədqiqat işlərinə başlanılıb:
“Ağdamda iki ədəd kəşfiyyat quyusu qazılıb, bu quyuların tədqiqatları aparılıb. Bu tədqiqatların nəticəsi artıq əsas verib deyək ki, bütün Ağdam şəhəri subartezian quyularından su ilə təmin olunacaq”.
“Azərsu” rəsmisi qeyd edib ki, hazırda Füzuli və Cəbrayıl şəhərləri ilə bağlı layihələndirmə işlərinə başlanılıb:
“Bilirsiniz ki, Dövlət Şəhərsalma və Arxitektura Komitəsi tərəfindən şəhərlərin Baş planları təsdiq edilir və bundan sonra “Azərsu” layihə işlərinə başlaya bilir. Hazırda isə yalnız Ağdam, Füzulinin Baş planları təsdiq edilib. “Azərsu” isə Füzuli və Ağdamın su təchizatı və kanalizasiya sistemlərinin yenidən qurulması işçi layihələrinin hazırlanmasına başlayıb. Zəngilan, Qubadlı və digər işğaldan azad edilmiş ərazilərin Baş planları Dövlət Şəhərsalma və Arxitektura Komitəsi tərəfindən təsdiqlənərək Azərsu ASC-yə göndəriləcək. Bundan sonra isə bu rayonlarda da layihələrin icrasına başlanıla bilər. Ancaq hazırda bu ərazilərdə çövcud su mənbələrinin müəyyən edilməsi ilə bağlı araşdırma işləri aparılır”.
İşğaldan azad olunmuş ərazilərdə hansı çayların suyundan içməli su kimi istifadə olunacağına gəldikdə isə, mütəxəssis bildirir ki, onu tədqiqatlar göstərəcək. O deyir ki, məsələn, Ağdamda ancaq yeraltı sulardan və subartezian sularından istifadə ediləcək:
“Bir daha təkrarlayım ki, Şuşada Zarıslı və Kirs çayının mənbələrindən istifadə ediləcək. Tədqiqatlar göstərir ki, Kəlbəcərdə isə yerüstü çaylardan istifadə ediləcək. Ancaq hələlik bu tədqiqatlar tam yekunlaşmayıb. Yekun qərar olmadığı üçün nəsə demək çətindir”.
C. Məmmədov vurğulayıb ki, azad olunmuş ərazilərdə həm yeraltı, həm də yerüstü sulardan içməli su kimi istifadə olunacaq:
“Bu ərazilər həm yeraltı, həm də yerüstü sular baxımından münbir ərazilərimizdir”.