Stanislav Jarın: Polşa 45 rus diplomatını ölkədən çıxarmaq qərarına gəlib
Polşa Xarici İşlər Nazirliyi 45 rusiyalı diplomatı casusluqda şübhəli bilib və onların ölkədən çıxarılmasını tələb edib. Bu barədə nazirliyin mətbuat katibi Stanislav Jarın bildirib.
“Daxili Təhlükəsizlik Agentliyi Polşada diplomatik pərdə altında işləyən 45 nəfərin siyahısını hazırlayıb. Bunlar diplomatik statusla işləyən, lakin faktiki olaraq Polşaya qarşı kəşfiyyat fəaliyyəti həyata keçirən insanlardır”, – deyə TASS Jarindən sitat gətirib.
Siyahıya Rusiya xüsusi xidmət orqanlarının əməkdaşları, eləcə də onlarla əməkdaşlıq edən şəxslər daxildir. Xarici İşlər Nazirliyinin nümayəndəsinin sözlərinə görə, bu şəxslərin fəaliyyəti Polşa qanunlarını pozur və Diplomatik Münasibətlər haqqında Vyana Konvensiyasına ziddir. Lakin o, Rusiya səfirinin ölkədən çıxarılmasının mümkün olub-olmadığını dəqiqləşdirməyib.
Mediyanın məlumatına görə, Rusiyanın Varşavadakı səfiri Sergey Andreev Polşa hakimiyyətinin diplomatları ölkədən çıxarmaq niyyəti barədə məlumatı təsdiqləyib. Onun sözlərinə görə, diplomatik idarənin əməkdaşları müxtəlif vaxtlarda getməlidirlər, onların maksimum müddəti beş gündür.
Andreev Varşavanın qərarını əsassız adlandırıb. Eyni zamanda o, Polşa ilə diplomatik əlaqələrin davam etdiyini vurğulayıb.
Hadisəni artıq Rusiya Xarici İşlər Nazirliyinin rəsmi nümayəndəsi Mariya Zaxarova şərh edib. Onun sözlərinə görə, rusiyalı diplomatların Polşadan qovulması halında, Rusiyanın müvafiq cavabı olacaq.