Misir Prezidenti Əbdülfəttah Sisinin Türkiyəyə səfəri ləğv olunub.

Bu barədə məlumatı Türkiyə mediası yayıb.

Buna səbəb kimi Sisinin Sankt-Peterburqda keçirilən Rusiya-Afrika sammitində iştirakı göstərilib.

Qeyd edək ki, daha əvvəl Sisinin iyulun 27-də Türkiyəyə səfər edəcəyi açıqlanmışdı.

Xatırladaq ki, Ankara ilə Qahirə arasında münasibətlər 2013-cü ildə Misir Prezidenti Məhəmməd Mursinin devrilməsindən sonra pisləşib. Bunun ardınca hər iki ölkə səfirlərini geri çağırıb.

2021-ci ilin martından isə ikitərəfli münasibətlərin bərpası başlayıb.