Tokayev Təhlükəsizlik Şurasını topladı – Rusiyaya görə
Qazaxıstan prezidenti Kasım-Jomart Tokayev Təhlükəsizlik Şurasının növbədənkənar iclasını keçirib.
Bu barədə Qazaxıstan PA – “Aqorda” məlumat yayıb.
Tədbirdə Baş nazirin, Baş prokurorun, Milli Təhlükəsizlik Komitəsinin sədrinin, müdafiə, daxili işlər və xarici işlər nazirlərinin hərbi sahədə vəziyyətlə bağlı tapşırıqların icrası ilə bağlı tədbirlər haqqında məruzələrini dinləyib.
“Rusiyada baş verənlərin onun daxili işi olmasına baxmayaraq, Qazaxıstan xalqı Qazaxıstanın dünyada ən uzun sərhədi olan dost ölkədəki vəziyyəti narahatlıqla qarşıladı. Rusiya Qazaxıstanın strateji tərəfdaşıdır”, – Tokayev qeyd edib.
Dövlət başçısı xatırladıb ki, Rusiya prezidenti Vladimir Putinlə telefon danışığında Rusiya hakimiyyətinin konstitusiya quruluşunun bərpası və vətəndaşlarının təhlükəsizliyinin təmin edilməsi üzrə tədbirlərini dəstəkləyib. Kasım-Jomart Tokayev hərbi əməliyyatların dayandırılmasına dair razılaşmanı alqışlayıb. Prezidentin sözlərinə görə, qanunun aliliyi prinsipi ictimai asayişin və sosial-iqtisadi inkişafın təmin edilməsinin əsası kimi istənilən dövlətin, o cümlədən Qazaxıstanın daxili siyasətində əsas prioritet olmalıdır.
Görüş zamanı ölkədə maliyyə-iqtisadi sabitliyin, eləcə də Qazaxıstan vətəndaşlarının təhlükəsizliyinin təmin edilməsinin zəruriliyi qeyd edilib. Prezident bütün idarələrin rəhbərlərinə böhran vəziyyətlərinin mümkün təhlükələrinə cavab verməyə hazır olmağı tapşırıb. Təhlükəsizlik Şurasının iclasından sonra Tokayev hökumət tərəfindən hazırlanmış Əməliyyat Fəaliyyət Planını təsdiqləyib.