Udaipur: Məhəmməd peyğəmbər qalmaqalı ilə bağlı yüksək hazırlıq vəziyyətindədir
Hindistanın şimalındakı Racastan əyalətində bir hindunun öldürülməsi bölgədə məzhəblərarası gərginliyə səbəb olub.
Kanhaya Lal adlı dərzi çərşənbə axşamı Udaipur bölgəsində bu hərəkəti lentə alan və internetdə yerləşdirən iki müsəlman kişi tərəfindən öldürülüb.
Onlar iddia ediblər ki, bu əməl siyasətçinin Məhəmməd peyğəmbər haqqında söylədiyi mübahisəli ifadələrə dəstəyinə görə qisasdır.
Hökumət internet xidmətlərini dayandırıb və kütləvi toplantıları qadağan edib.
Polis videoda özünü təqdim edən iki nəfəri həbs edib.
Başqa bir videoda isə, onlar sui-qəsdlə öyünüblər və həmçinin baş nazir Narendra Modini bıçaqla təhdid ediblər. Racastan polisinin yüksək rütbəli məmuru mediadan qətlin videosunu yayımlamamağı xahiş edib, çünki buna, “baxmaq çox dəhşətlidir”.
Qurbanın keçən ay Məhəmməd peyğəmbər haqqında mübahisəli şərhlər edən keçmiş Bharatiya Janata Partiyasının (BJP) sözçüsü Nupur Şarmanı dəstəkləyən sosial media paylaşımı etdiyi iddia edilir.
Onun şərhləri Hindistana kəskin etirazlarını bildirən bir neçə İslam ölkəsi ilə diplomatik mübahisəyə səbəb olub. BJP sonradan xanım Şarmanı partiyadan uzaqlaşdırdı.
Mübahisə Hindistanda nümayişçilərin daş atmasından və hökumət əmlakına ziyan vurmasından sonra, zorakılığa çevrilən dini etirazlara da səbəb olub.
Indian Express-in məlumatına görə, Kanhaiya Lal qətldən üç həftə əvvəl dini hissləri təhqir etmək ittihamı ilə polis tərəfindən həbs edilib. O, azadlığa buraxıldıqdan sonra, həyatına təhlükə olduğunu əsas gətirərək müdafiə üçün polisə müraciət edib.
