Ərizə qəbuluna başlanılır – Kimlərə üstünlük veriləcək?

İyulun 16-dan məktəbəqədər təhsil müəssisələrinə ərizələrin onlayn qeydiyyatına start veriləcək. 

İctimai Rəy xəbər verir ki, bu barədə Məktəbəqədər və Ümumi Təhsil üzrə Dövlət Agentliyi məlumat yayıb.

Bildirilib ki, uşaqların təhsil müəssisəsinə növbəyə yazılma prosesi Regional Təhsil İdarələri və Naxçıvan Muxtar Respublikası üzrə 19 iyul, Bakı şəhəri üzrə isə 26 iyul tarixindən başlayacaq.

Təhsil müəssisəsinə yeni qəbul olunmuş uşaqlar qrupların komplektləşdirilməsi prosesi başa çatdıqdan sonra cari ilin sentyabrın 1-dən etibarən tədrisə başlaya bilərlər. Boş yerlərə qəbul il ərzində aparılır. Dövlət məktəbəqədər təhsil müəssisələrinə uşaqların qəbulu elektron qaydada www.bq.edu.az  elektron sənəd qəbulu sistemi vasitəsilə aparılır.

Eyni zamanda qeyd edilib ki, 16 maydan etibarən elektron sistem üzrə növbələrin yaradılması müvəqqəti olaraq məhdudlaşdırılıb. Hər hansı səbəbdən elektron sistemdə qeydiyyatı şəxsən aparmaq imkanı olmayan valideynlər əvvəlcədən müəyyən edilmiş “ASAN xidmət” mərkəzlərinə müraciət edə bilərlər.

Agentlik, həmçinin məktəbəqədər təhsil müəssisələrinə qəbul prosesində kimlərin üstünlük hüququna malik olduğuna da aydınlıq gətirib.

– Şəhid ailələrinin övladları;

– Qarabağ müharibəsi və Vətən Müharibəsi iştirakçılarının və müharibə ilə əlaqədar əlilliyi müəyyən edilmiş şəxslərin uşaqları;

– tək işləyən valideynlərin uşaqları;

– orqanizmin funksiyalarının 61-100 faiz pozulmasına görə əlilliyi müəyyən edilmiş şəxslərin uşaqları;

– hərbi xidmətdə olan valideynlərin uşaqları;

– təhsilalan anaların uşaqları;

– çoxuşaqlı ailələrdən olan uşaqlar;

– qəyyumluqda olan uşaqlar.