Mərkəzi Bankın məlumatı:  Xarici investorların Azərbaycana marağı artıb

2021-ci ilin doqquz ayında Azərbaycanın qeyri-neft sektoruna birbaşa xarici investisiyaların (BXİ) həcmi ötən ilin müvafiq dövrü ilə müqayisədə 16,5% artaraq, 579,3 milyon ABŞ dolları təşkil edib.

Ümumilikdə, bu ilin yanvar-sentyabr aylarında Cənubi Qafqazın ən böyük iqtisadiyyatına birbaşa xarici investisiyaların həcmi 2020-ci ilin müvafiq dövrü ilə müqayisədə 8% artaraq, 3,6 milyard ABŞ dolları təşkil edib, Azərbaycanın neft-qaz sektoru isə, birbaşa xarici investisiyaların 84,2 faizi isə ölkəyə yatırılıb.

İctimairey.az xəbər verir ki,  Mərkəzi Bankın məlumatına görə, göstərilən dövr ərzində Azərbaycan iqtisadiyyatına ən böyük birbaşa investisiyalar:  Böyük Britaniya – 1,2 milyard dollar, Türkiyə – 530 milyon dollar, ABŞ – 411 milyon dollar, Malayziya – 324,8 milyon dollar, Kipr – 231,3 milyon dollar, Yaponiya – 215,8 milyon dollar, İran – 209,4 milyon dollar.

Maliyyə tənzimləyicisi bu ilin 9 ayı ərzində ölkənin xalis maliyyə aktivlərinin 740,1 milyon dollar artdığını da bildirir. Maliyyə aktivlərinin artımı xaricdən cəlb olunmuş xalis birbaşa investisiyaların daxil olması hesabına təmin edilib. Bundan əlavə, 388,2 milyon ABŞ dolları məbləğində portfel investisiyalarının və 219,7 milyon ABŞ dolları məbləğində digər investisiyaların toplanması müsbət dinamikaya töhfə verib.

İctimairey.az