Paşinyan və Putin telefonla Dağlıq Qarabağ ətrafındakı vəziyyəti müzakirə ediblər
Ermənistanın baş naziri Nikol Paşinyan və Rusiya prezidenti Vladimir Putin arasında telefon danışığı olub. Bu barədə çərşənbə günü Kremlin mətbuat xidməti məlumat yayıb.
Söhbətin Ermənistan tərəfinin təşəbbüsü ilə baş tutduğu qeyd edilir.
“Dağlıq Qarabağ ətrafında vəziyyətin müzakirəsi davam edib. Rusiya, Ermənistan və Azərbaycan liderləri arasında 9 noyabr 2020-ci il, 11 yanvar və 26 noyabr 2021-ci il tarixli üçtərəfli sazişlərin ardıcıl icrasının vacibliyi bir daha təsdiqlənib.
Tərəflər regionda sabitliyin təmin edilməsində Rusiya sülhməramlı kontingentinin rolunu qeyd ediblər.
Bundan başqa, Paşinyan və Putin Ermənistan və Rusiya arasında strateji tərəfdaşlıq və müttəfiqliyin gələcək inkişafı üçün, bəzi aktual məsələləri müzakirə ediblər.
Xatırladaq ki, Ermənistanın baş naziri ilə Rusiya prezidenti arasında əvvəlki söhbət avqustun 8-də olub. Sonra iki ölkə liderləri Dağlıq Qarabağ ətrafında vəziyyətin inkişafı, o cümlədən Ermənistan-Azərbaycan sərhədində təhlükəsizliyin təmin edilməsi məsələlərini müzakirə ediblər.
