“Boğazlarından kəsdikləri pulu taksiçiyə verməyə məhkum olurlar” – Deputatdan ETİRAZ

İctimairəy.Az bildirir ki, bunu Milli Məclisin deputatı Fazil Mustafa həftəsonu işləməyən ictimai nəqliyyatlardan danışarkən deyib.

O bildirib ki, Operativ Qərargah hələ də inadından dönmək istəmir:

“Yenə də metronu, avtobusları işləməyə qoymayacaqlar, zavallı insanlar düşəcəklər taksi axtarışına. Pulu-parası olmayan da otursun evində, bütün vacib işlərini təxirə salsın. İnsanlarımız həm maddi, həm də mənəvi sıxıntını yaşayacaqlar. Onsuz da yay vaxtı  insanların bir qismi məzuniyyətdədir, iş yerlərinə də elə bir axın yoxdur. Heç kim də əsaslandıra bilmir ki, iki gün ictimai nəqliyyat işləməyəndə pandemiya azala bilər. Əksinə, nəqliyyatda sıxlıq yaratmaqla, insanlar üçün yoluxma riskini daha da artırırlar”.

Millət vəkilinin sözlərinə görə, metronun girişində qızdırmanı yoxlamaq üçün aparatın qoyulması profilaktika üçün kifayət edir:

“İctimai nəqliyyat həftənin bütün günləri işləməlidir. Əminəm ki, özü metro ilə, avtobusla gedib-gəlmək məcburiyyətində olan kimsə belə bir qərarı qəbul etməz. Məsələyə öz komfortundan yanaşanlar anlamalıdırlar ki, bu qərarla eyni vaxtda şəhərətrafından gələn vətəndaş, xəstəxanaya metro ilə tələsən tibb bacısı, maaşı aşağı olan avtobus sürücüsü, televiziyaya, redaksiyaya tələsən jurnalist, yaxud da bir pensiyaçı, bir əlill boğazından kəsdiyi pulu taksiçiyə verməyə məhkum olur. Fikrimcə, təcili olaraq bu qərara baxılmalı, Bakı şəhərində bütün ictimai nəqliyyatın işləməsi təmin edilməlidir”.//Sfera.az