Moskva bu cür təxribatçı hərəkətləri ilə Bakı və Ankaranın Ukrayna xalqına dəstəyinin qarşısını ala bilməz

Rusiya işğalçı siyasətini, azğınlığını davam etdirir. Avqustun 28-i, gecə saat 3 radələrində Ukraynanın paytaxtı Kiyev şəhərinə Rusiyanın Silahlı Qüvvələri tərəfindən növbəti raket və dron hücumları baş verib.

Raketlərdən birinin Azərbaycanın Ukraynadakı səfirliyinin binasından cəmi yüz metr aralıda düşdüyü bildirilir. Məlumata görə, raket zərbəsi yanğına və güclü partlayışa səbəb olub. Partlayış nəticəsində binaya zərər dəyib, pəncərələr qırılıb, konsulluq bölməsinin damında çatlar əmələ gəlib.

Ukraynadakı səfirliyimizin yaxınlığına raket atılması Rusiyanın növbəti cinayətkar addımıdır. Lakin xoşbəxtlikdən, səfirliyimizin əməkdaşları arasında xəsarət alan olmayıb. Səfirlik fəaliyyətini davam etdirir.

Rusiya, həmçinin Kiyev ətrafında “Bayraktar” PUA zavoduna da güclü zərbələr endirib. Bu, Rusiyanın həmin zavoda son altı ayda ikinci belə hücumudur.

Xatırladaq ki, bundan öncə, iyulun 10-na keçən gecə Rusiyanın Kiyevə raket və PUA hücumu zamanı da PUA-lardan biri Azərbaycanın Ukraynadakı səfirliyinin yaxınlığına düşmüşdü.

Habelə, son iki ayda Rusiya davamlı olaraq bir neçə dəfə Ukrayna ərazisindəki SOCAR infrastrukturlarına aid obyektləri vurub.

Bütün bunlar onu göstərir ki, Kreml Azərbaycan və Türkiyənin Ukraynanın ərazi bütövlüyünü dəstəkləməsini və bu ölkəyə humanitar yardım göstərməsini, iqtisadi əməkdaşlığı genişləndirməsini bir fakt kimi, reallıq kimi qəbul etmək istəmir. Çünki Azərbaycan və Türkiyənin bu addımları Rusiyanın işğalçı siyasətinə mane olur.

Lakin Moskva bu cür təxribatçı hərəkətləri və düşmənçilik mövqeyi ilə Bakı və Ankaranın Ukrayna xalqına dəstəyinin qarşısını ala bilməz. Rusiyanın Kiyevə endirdiyi zərbələr dünya birliyini Ukraynada sülhün və təhlükəsizliyin qorunması üçün daha təsirli addımlar atmağa və Rusiyanın zorakılığını dayandırmaq üçün hərəkətə keçməyə vadar edəcək. Kremlin odla oynamaq siyasəti rusların özləri üçün acınacaqlı gələcək vəd edir.

Əlisahib Hüseynov,
Azərbaycan Həmrəylik Komitəsinin sədri