Sülh ağrılı olacaq, ancaq xalqı inandırmalıyıq

Beynəlxalq ictimaiyyət 29.8 min kv.km ərazinin tanındığını açıq şəkildə bəyan etdikdə Ermənistan və region üçün sülh gələcək. Ermənistan isə heç bir ölkəyə ərazi iddiasının olmadığını bəyan edəcək.

Bunu Ermənistan Baş naziri Nikol Paşinyan deyib.

“Sülhə nail olmaq dörd qonşu ölkə ilə normal münasibətlərin olması deməkdir. Gürcüstan və İran məsələsində söhbət əməkdaşlığın daha da dərinləşdirilməsindən gedir. Söhbət daha çox Türkiyə və Azərbaycanla münasibətlərin normallaşdırılmasından gedir. Bu nə dərəcədə real tapşırıqdır və eyni Azərbaycanın hərəkətləri nə dərəcədə sülhün möhkəmlənməsinə yönələcək. Siyasi və diplomatik sahədə kompromislər əldə olunarsa, bu, Ermənistan vətəndaşları üçün nə dərəcədə məqbul olacaq və vətəndaşlar qismən ağrılı olacaq kompromis həll yollarının həyata keçirilməsinə imkan verəcəkmi?”, – Paşinyan bildirib.

Erməni baş nazirin sözlərinə görə, vətəndaşları inandırmaq Ermənistan hakimiyyətinin funksiyasıdır:

“Hökumət onlara rəhbərliyin düşüncə prosesini və motivasiyasını aydın şəkildə çatdırmalıdır. İnsanlar başa düşdükdən sonra bu qərarlarla razılaşacaqlar. Əgər bu edilməsə, o zaman Ermənistanın inkişafına heç kim imkan verməz”.