Ukraynada müharibə: Putin Zelenski ilə “birbaşa ciddi danışıqlara” çağırıb
Almaniya kanslerinin ofisi bildirib ki, Fransa və Almaniya liderləri Rusiya lideri Vladimir Putini Ukrayna prezidenti ilə “birbaşa [və] ciddi danışıqlar aparmağa” çağırıblar.
Emmanuel Makron və Olaf Şolz Putinlə 80 dəqiqə telefonda danışıblar.
Kansler deyib ki, cütlük “dərhal atəşkəs və rus qoşunlarının çıxarılmasında təkid ediblər”.
Kremlin məlumatına görə, Rusiya lideri Moskvanın Kiyevlə dialoqun bərpasına açıq olduğunu bildirib.
Amma məlumatda Putinlə ukraynalı həmkarı Vladimir Zelenski arasında birbaşa danışıqların mümkünlüyündən bəhs edilməyib.
Ukrayna prezidenti daha əvvəl demişdi ki, o, danışıqlara “can atmır”, lakin əlavə edib ki, münaqişəyə son qoymaq üçün çox güman ki, danışıqlara ehtiyac var.
Fevralın 24-də Rusiyanın işğalından sonra Rusiya və Ukrayna nümayəndə heyətləri uzaqdan və şəxsən bir neçə dəfə danışıqlar aparıb, lakin son vaxtlar səylər dalana dirənib.
Fransa və Almaniya həmçinin Putini Mariupoldakı Azovstal polad zavodunda əsir götürülən 2500 ukraynalı döyüşçünü azad etməyə çağırıb.
Zavod rus qoşunları tərəfindən amansızcasına bombalanıb və hazırda xarabalıqlar içində olan cənub liman şəhərinin son qalasına çevrilib.
Bu ayın əvvəlində Moskva rəsmiləri zavodu müdafiə edən sonuncu döyüşçülərin təslim olduqlarını, prezident Zelenski isə, onların tərk etmələrinə icazə verildiyini bildirib.
Rusiya daha əvvəl 900-dən çox döyüşçünün Rusiyanın işğalı altında olan Donetskdə yerləşən Olenevka kəndində yeni açılan koloniyaya köçürüldüyünü bildirib. Daha az sayda ağır yaralı Novoazovsk şəhərində, həmçinin Donetskdə xəstəxanaya aparılıb.
Ukrayna onların məhbus mübadiləsi çərçivəsində azad ediləcəyinə ümid edir, lakin Rusiya bunu təsdiqləməyib. Bəzi rusiyalı deputatlar döyüşçülərin mühakimə edilməli və ya hətta edam edilməli olduğunu iddia edirlər.
Həmçinin söhbət zamanı Fransa və Almaniya liderləri Putindən taxıl ixracına icazə vermək üçün, Ukraynanın Odessa limanının Rusiya blokadasını ləğv etməyi xahiş ediblər.
Kreml bildirib ki, cənab Putin qlobal ərzaq böhranı riskini azaltmağa kömək edəcək variantlara baxmağı təklif edib, lakin Qərbdən sanksiyaları ləğv etməyi tələb edib.
Rusiya həmçinin Fransa və Almaniyaya Ukraynaya silah tədarükünü artırmamaq barədə xəbərdarlıq edib və bunun qeyri-sabitliyi daha da artıra biləcəyini bildirib.