Əlisahib Hüseynov: … İrəvan bu iki yoldan birini seçə bilər. Üçüncü yol yoxdur.
Bu həqiqət eynilə hazırkı Ermənistana da şamil olunur. 44 günlük müharibədən məğlub durumda çıxan Ermənistanın indi yalnız iki yolu var: ya müharibədən sonra imzalanan sənədlərin – 10 noyabr və 11 yanvar Bəyanatlarının, Soçi bəyannaməsinin şərtlərinin icra edilməsini təmin etməlidir, yadaki Qərbdəki havadarlarının geosiyasi oyunlarının alətinə çevrilmək istiqamətində səylərini davam etdirməli, habelə Sorosun və xaricdəki erməni lobbisinin sifarişlərini icra etməlidir. İrəvan bu iki yoldan birini seçə bilər. Üçüncü yol yoxdur.
Müşahidələrimiz onu göstərir ki, çox təəssüf ki, Ermənistan rəhbərliyi öz xalqının maraqlarına cavab verən birinci yolu deyil, Qərbə yaxınlaşmaq, Sorosun və erməni lobbisinin diktəsi ilə hərəkət etməyə üstünlük verir. Xüsusən də Brüssel görüşü ərəfəsində Ermənistanın sərgilədiyi qeyri-konstruktiv davranışlar və Soçi bəyannaməsinin ruhuna zidd addımları Paşinyan iqtidarının yanlış seçim etdiyini göstərir. Əslində Nikol Paşinyanın bu saat atmalı olduğu ən doğru addım məhz erməni xalqının mənfəətinə uyğun şəkildə davranmaq və Cənubi Qafqazda sülhə töhfə vermək yolunu seçməsi olardı. Erməni xalqının mənfəəti isə ilk növbədə Azərbaycanla sülhdən, sərhədlərin delimitasiya və demarkasiyasının başa çatdırılmasından, Zəngəzur dəhlizinin açılmasından keçir.
Paşinyan xaricdəki “ağa”larının göstərişlərinə uyub və daxildəki revanşist müxalifətin təzyiqlərindən çəkinib bu proseslərə mane olmamalı, sərhədlər və dəhliz məsələsini süni surətdə əngəlləməməlidir. Bu prosesin qarşısını almaq zatən mümkün deyil. Sərhədlərin müəyyənləşdirilməsi də, dəhlizin açılması da onsuz da əvvəl-axır gerçəkləşəcək. Ermənistan bunun qarşısını heç cürə ala bilməz. Sadəcə olaraq bu məqamda Ermənistanın atmalı olduğu yeganə addım konstruktivlik və rasionallıq nümayiş etdirərək dəhlizin nə vaxt açılacağı ilə bağlı bizə konkret tarix göstərməsi, real zəmanət verməsi olardı. Təsadüfi deyil ki, bunu Prezident İlham Əliyev də dekabrın 6-da Qubanın Qonaqkənd qəsəbəsində yeni inşa olunan Mədəniyyət Evində yaradılan şəraitlə tanışlıqdan sonra qəsəbə sakinləri ilə görüşü zamanı çıxışında səsləndirdi.
Dövlət başçımız qeyd etdi ki, qarşı tərəf Zəngəzur dəhlizinin nə vaxt açılacağı ilə bağlı bizə tarix verməlidir. Belə olan halda, heç bir problem olmayacaq. Ermənistan rəhbərliyi də, erməni ictimaiyyəti də artıq başa düşməlidir ki, bu ən optimal yoldur. Biz istəmirik ki, bütün bunlara güc yoluyla nail olaq. Biz istəyirik ki, bu məsələ konstruktiv şəkildə, danışıqlar yolu ilə, qarşılıqlı anlaşma yolu ilə həll olunsun. Ermənistan rəhbərliyi cığallıq etməklə, qeyri-ciddi davranışlar sərgiləməklə, Moskvada və Soçidə imzalanmış öhdəliklərin arxasından qaçmaqla ölkəsini ağ günə çıxara, xalqına yaxşılıq edə bilməz. Paşinyanın hazırda tutduğu bu cür qeyri-konsruktiv yol erməni xalqına yaxşı heç nə vəd etmir. Yaxşı olardı ki, Ermənistan rəhbərliyi vaxtında bu həqiqəti anlasın.
Əlisahib Hüseynov,
Milli Həmrəylik Partiyasının sədri