Azərbaycanda fiziki şəxslərin nağd ödənişləri məhdudlaşdırılacaq

Azərbaycanda pərakəndə ticarətdə nağd ödənişlərə limit tətbiq edilməsi təklif olunub. Yenilik bu gün, noyabrın 24-də respublika Milli Məclisinin plenar iclasında müzakirəyə çıxarılan “Nağdsız hesablaşmalar haqqında” qanuna dəyişiklikdə nəzərdə tutulub.

Qanun layihəsinə əsasən, pərakəndə ticarətdə nağd ödənişlərin limiti 4000 manat (hazırkı məzənnə ilə təxminən 2350 dollar) təşkil edəcək.

Bundan başqa, sənəd respublika ərazisində avtonəqliyyat vasitələrinin yalnız nağdsız ödəniş yolu ilə alqı-satqısını nəzərdə tutur.

Qanun layihəsinə əsasən, ölkənin tibb müəssisələrində 500 manatdan artıq (təxminən 300 ABŞ dolları) məbləğində xidmətlər də nağdsız qaydada ödəniləcək.

Müzakirələrdən sonra qanun layihəsi səsə qoyularaq ikinci oxunuşda qəbul edilib.