4 dünya nəhəngi ABŞ-da yarım trilyon dollarlıq layihəyə başlayır

Amerikanın “OpenAI: (chatbot ChatGPT-nin tərtibatçısı), Oracle Corp., Yaponiyanın SoftBank-ı və BƏƏ dövlət investisiya şirkəti olan MGX OpenAI-a ABŞ-da məlumat mərkəzləri qurmaq üçün Stargate adlı birgə müəssisə yaradır.

Musavat.com The Wall Street Journal-a istinadən xəbər verir ki, şirkətlər birgə müəssisəyə 100 milyard dollar sərmayə qoyur və növbəti dörd il ərzində 500 milyard dollara qədər sərmayə qoymağı planlaşdırır.

Qəzetin məlumatlı mənbələrinin verdiyi məlumata görə, 100 milyard dollara Co Baydenin prezidentliyi dövründə şirkətlərin elan etdiyi və işə saldığı layihələrə investisiyalar daxildir. Hər bir tərəfdaşın sərmayə qoyacağı dəqiq məbləğ açıqlanmır.

Planlar Ağ Evdə ABŞ-ın yeni prezidenti Donald Tramp, OpenAI-nin baş direktoru Sem Altmanın, Oracle-ın baş direktoru Larri Ellison və SoftBank-ın baş direktoru Masayoşi Sonun qatıldığı mərasimdə açıqlanıb, lakin əsas detallar hələ bəlli deyil.

Hələlik ilk Stargate data mərkəzinin Texasda tikiləcəyi məlumdur. WSJ mənbəyi deyir ki, tikinti keçən il başlayıb, mərkəz Oracle tərəfindən idarə olunacaq və OpenAI tərəfindən istifadə olunacaq.

Eyni zamanda OpenAI bildirib ki, o, bütün Stargate-in operatoru olacaq və SoftBank onu maliyyələşdirəcək.

Yapon şirkəti bunun üçün borc götürməyi planlaşdırır. Masayoşi Son birgə müəssisənin idarə heyətinin sədri olacaq.

WSJ mənbələrinə görə, şirkət digər investorlardan da kapital cəlb etmək niyyətindədir.

Stargate-in texnoloji tərəfdaşları arasında Microsoft Corp. (OpenAI-nin ən böyük investoru), həmçinin çip istehsalçıları Arm Holdings və Nvidia Corp. var.