Azərbaycanda bütün dini icmaların nümayəndələri dinc yanaşı və təhlükəsiz şəraitdə yaşamaq imkanlarına malikdir

Azərbaycanın xarici işlər naziri Ceyhun Bayramovun Vatikana səfəri çərçivəsində Roma Papası XIV Leo ilə görüşü və eləcə də Papanın Türkiyəyə səfər etməsi Vatikan ilə Türk dünyası arasında əlaqələrin genişlənməsi baxımından xüsusi əhəmiyyət daşıyır. Həm Azərbaycan XİN başçısının Roma Papası ilə görüşü əsnasında, həm də Türkiyə Prezidenti Rəcəb Tayyib Ərdoğanla Roma Papasının görüşü zamanı dinlərarası dialoq və qlobal sülhlə yanaşı, Azərbaycan-Vatikan, Türkiyə-Vatikan əlaqələri, həmçinin regional və beynəlxalq proseslər, o cümlədən Azərbaycan-Ermənistan normallaşması və Yaxın Şərqdəki vəziyyət də müzakirə olunub.

Müqəddəs Taxt-Tac (Vatikan dövləti) Azərbaycanda qorunub saxlanılan dinlərarası tolerantlıq, dialoq mühitinə, zəngin multikulturalizm ənənələrinə həmişə yüksək qiymət verib. Azərbaycanda bütün dini icmaların nümayəndələri dinc yanaşı və təhlükəsiz şəraitdə yaşamaq imkanlarına malikdir. Bu gün Bakıda hətta katolik kilsəsi də fəaliyyət göstərir. Azərbaycan daha dərin qarşılıqlı anlaşmaya, qlobal həmrəyliyə aparan yol kimi mədəniyyətlərarası mübadiləni və dinlərarası dialoqu təşviq etməsi ilə həqiqətən də dərindən öyünə biləcək bir ölkədir. Bu, həm də bizim xalqımızın tarixən sülhsevər xalq olmasından irəli gəlir.

Azərbaycan-Vatikan əlaqələri də uzun tarixi köklərə dayanır və bu gün də ölkəmizlə Müqəddəs Taxt-Tac arasında sıx dostluq və əməkdaşlıq münasibətləri mövcuddur. Vatikan hər zaman rəsmi Bakının sülh siyasətini dəstəkləyib. Biz erməni lobbisinin və Qərbin (xüsusən də Fransanın, Avropa Parlamentinin) ölkəmizə qarşı əsassız hücumları zamanı həmişə Vatikanın ədalətli mövqeyini hiss etmişik. Bu kontektsdə Prezident İlham Əliyevin yürütdüyü çoxvektorlu xarici siyasətin, çevik diplomatiyanın müsbət nəticələrini də xüsusilə qeyd etməliyik. Məhz bu amilin nəticəsində həm Azərbaycan-İtaliya ikitərəfli əlaqələri, həm də Azərbaycan-Vatikan münasibətləri son illərdə daha da möhkəmlənib. Ceyhun Bayramovun Vatikanda baş tutan görüşləri və Roma Papasının Türkiyəyə dördgünlük səfəri onu göstərir ki, bu gün Vatikanın Türk dünyasının aparıcı ölkələri ilə əlaqələri yeni mərhələyə daxil olmaqdadır. Vatikan Azərbaycan və Türkiyənin həm regional, həm də qlobal proseslərdəki rolunu yüksək qiymətləndirir.

Əlisahib Hüseynov,

Azərbaycan Həmrəylik Komitəsinin sədri