Onlar “beşinci kolon” üzvlərinin vasitəsilə “hibrid müharibə” əməliyyatları həyata keçirməyə çalışır

Müstəmləkəçi sovet quruluşunun süqutundan artıq 34 il keçsə də, lakin çox təəssüf ki, müasir Azərbaycan cəmiyyətinin bəzi fərdlərinin düşüncə və yaddaşlarında hələ də qırmızı sovet imperiyasının – keçmiş SSRİ-nin izləri qalmaqda davam edir. Onlar sovet dövrünün xiffəti ilə yaşayır və öz milli dövlətimizə qarşı əks təbliğat aparırlar. Bu adamlar müstəqillyimizin əleyhinə çıxış edirlər. Sosial şəbəkələrdə kommunist ideologiyasının təbliği məqsədilə keçmiş SSRİ bayraqları ilə yürüş etməyə cəhd göstərən bir qrup şəxsin videogörüntülərinin yayılması da bu acı həqiqəti təsdiqləyir.

Həmin videogörüntülərdə bir qrup şəxsin Bakıda mənfur SSRİ bayraqları ilə yürüş etməyə cəhd göstərdiyi əks olunub. Lakin Daxili İşlər Nazirliyinin (DİN) keçirdiyi operativ tədbirlər nəticəsində həmin şəxslər – Abdulla İbrahimli, İbrahim Əsədli və yürüşdə iştirak edən digər şəxslər saxlanılıb və onların barəsində cinayət işi başlanılıb. İlkin istintaq zamanı müəyyən edilib ki, bu şəxslər başqa bir dövlətin dəstəyi ilə maliyyələşib, ofis icarəyə götürərək qrup halında fəaliyyət göstəriblər. Onların ofisində aparılan baxış zamanı sovet-kommunist ideologiyasının təbliğinə yönəlik çoxsaylı materiallar, bayraqlar, radikallığı təşviq edən kitablar, CD-disklər və elektron daşıyıcılar aşkarlanıb.

Bütün bunlar onu göstərir ki, sözügedən şəxslər adi “obıvatel”lər deyil, milli dövlətçiliyimizə qarşı planlı, sistemli iş aparmaq üçün formalaşdırılmış gizli mütəşəkkil dəstənin üzvləridir. Onlar keçmiş SSRİ-nin təbliği adı altında, əslində, hazırkı Rusiyanın geosiyasi maraqlarına xidmət etmək üçün cəlb olunublar. Bu adamlar DİN tərəfindən vaxtında aşkarlanıb saxlanılmasaydı, çox güman ki, onlar Azərbaycana qarşı müəyyən təxribatlar da həyata keçirəcəkdilər. Kreml Azərbaycana və digər postsovet ölkələrinə qarşı məhz bu cür təxribatçıların, “beşinci kolon” üzvlərinin vasitəsilə “hibrid müharibə” əməliyyatları həyata keçirməyə çalışır.

Xatırlayırsınızsa, bir müddət əvvəl İmişli rayonunun Sarıxanlı kəndində 9 May Qələbə günü tədbiri zamanı da SSRİ bayrağı qaldırılmış və həmin tədbirdə çıxış edən rayon Ağsaqqallar Şurasının sədri Saleh Səmədovla yanaşı, bir sıra digər şəxslər yaxalarına çar Rusiyasının işğalçılıq rəmzi olan “Georgi lenti” taxmışdılar. O hadisədən sonra Saleh Səmədov vəzifəsindən uzaqlaşdırıldı və onun barəsində cinayət işi başlanıldı. Həmçinin, bugünlərdə Bakıda SSRİ bayraqları ilə yürüş etməyə cəhd göstərən məlum qrup üzvlərinin barəsində də cinayət işi başlanılıb.

SSRİ simvollarının ictimai istifadəsi və təbliği qanunvericiliklə məhdudlaşdırıldığı halda, bu adamların şüurlu surətdə pozuculuq fəaliyyəti ilə məşğul olması sıradan bir xırda xuliqanlıq hadisəsi deyil. Onlar milli dövlətçiliyimizə qarşı açıq-aşkar zidd mövqe tuturlar. Bu cür anti-milli ünsürlərin sərt şəkildə cəzalandırılması çox vacibdir. “Bəlkə də qaytardılar” düşüncəsilə yaşayan “sovet uşaqları”nın həbsi digərlərinə də görk olar.

Əlisahib Hüseynov,

Azərbaycan Həmrəylik Komitəsinin sədri