Putin və Trampın görüş yeri razılaşdırıldı – Səhnə arxasında Zelenski də varmı?

Rusiya və ABŞ prezidentləri Vladimir Putin və Donald Tramp arasında çoxdan gözlənilən birbaşa görüşün keçirilməsi ilə bağlı qərar artıq verilib.

Musavat.com xəbər verir ki, bu haqda Rusiya prezidentinin köməkçisi Yuri Uşakov açıqlama verib.

“Görüş yeri artıq razılaşdırılıb və yaxın günlərdə açıqlanacaq”, – deyə Kreml rəsmisi bildirib.

Onun sözlərinə görə, tərəflər görüşün təşkili ilə bağlı son hazırlıq mərhələsinə keçiblər.

Bütün diqqət isə bu görüşün harada və hansı tərkibdə baş tutacağına yönəlib. Uşakovun sözlərinə əsasən, Trampın xüsusi nümayəndəsi Stiv Uitkoff üçtərəfli görüş – Tramp, Putin və Zelenski formatını təklif etsə də, Moskva bu ideya ilə bağlı “şərhsiz” mövqe sərgiləyib. Bu isə Zelenskinin danışıqlarda iştirak perspektivinə dair müəmmalı bir sükut yaradıb.

Trampın ikinci prezidentliyi dövründə Rusiya ilə münasibətləri “yeni model” üzərində qurmaq istədiyi uzun müddətdir danışılırdı. Hazırkı danışıqların fonunda bu “yeni modelin” ilk real konturları görünməkdədir. Xüsusilə də, Trampın Ukrayna ilə bağlı atəşkəs təşəbbüsləri, NATO-ya təzyiqi və Avropanı “öz oyun qaydalarına” çəkmək istəyi bu görüşə dramatik məna qatır.

Putin tərəfi isə bu görüşə geosiyasi çıxış nöqtəsi kimi baxır – həm Ukraynadakı müharibədə, həm də Qərblə qarşıdurmada mövqeyini gücləndirmək üçün Tramp amilindən yararlanmaq istəyir.

Rusiya nümayəndəsinin “Zelenski məsələsinə şərh vermədik” ifadəsi əslində Moskvanın Kiyev hakimiyyətini hələ də danışıqlar masasında “leqal tərəfdaş” kimi görmək istəmədiyini göstərir. Bu həm də Trampın Ukrayna mövzusundakı təşəbbüslərinə qarşı ehtiyatlı münasibətin əlaməti ola bilər.

Böyük ehtimalla görüş Avropanın neytral ölkələrindən birində – Vyanada və ya Cenevrədə baş tutacaq. Hadisə yerinin açıqlanması ilə paralel Qərb, Çin və region ölkələrinin diplomatik fəallığı da artacaq.

Bu görüş, sadəcə Tramp və Putin arasında deyil, Qlobal Qərb və Avrasiya blokları arasında kritik balans nöqtəsi ola bilər.