Həqiqətləri bu cür açıq şəkildə təhrif etmək, dezinformasiya yaymaq “Deutsche Welle” kimi nüfuzlu media qurumu üçün rüsvayçılıqdır

Almaniyanın “Deutsche Welle” media qurumunun “Ermənistanın Qafqazda torpaq və kimlik uğrunda mübarizəsi” adlı sənədli filmini yayımlaması bu qurumun da keçmiş USAID ilə, “Azadlıq radiosu” və “Amerikanın səsi” radiosu ilə, “Le Figaro” qəzeti ilə eyni mənbədən – erməni lobbisindən “qida”landığını göstərir. Bu cür ermənipərəst KİV-lər və qurumlar üçün müqəddəs heç nə yoxdur. Onlar ötən əsrin 90-cı illərinin əvvəllərində təcavüzkar Ermənistan tərəfindən Azərbaycan ərazilərinin qanunsuz işğalını “azadlıq uğrunda mübarizə” adlandıracaq qədər mənəviyyatsız və vicdansızdırlar.

Erməni lobbisinə satılmış bu cür təşkilatların, kütləvi informasiya vasitələrinin (KİV) məlum hesabatlarını və reportajlarını hazırlayan əməkdaşları, əslində, 1990-cı illərin əvvəllərində Azərbaycanın beynəlxalq səviyyədə tanınmış ərazilərinin 20 faizinin Ermənistan tərəfindən işğal edildiyini və 30 ilə yaxın işğal altında saxlanıldığını, habelə 1 milyona yaxın azərbaycanlının həmin ərazilərdən zorla köçkün düşdüyünü, 7 şəhər, 900 qəsəbə və kəndimizin erməni vandalları tərəfindən tamamilə xarabalığa çevrildiyini, məscidlərimizin dağıdıldığını, qəbiristanlıqlarımızın məhv edildiyini, muzeylərimizin və tarixi abidələrimizin talan edildiyini, Xocalıda və digər yaşayış məntəqələrində insanlarımızın milli-etnik ədavət zəminində soyqırımına məruz qaldığını, ermənilər tərəfindən vəhşicəsinə qətlə yetirildiyini yaxşı bilirlər. Lakin bütün bu faktları, tükürpərdici həqiqətləri öz hesabatlarına, çəkdikləri film və reportajlara daxil etməkdən vicdansızcasına imtina edirlər. Çünki “ağa”larından belə tapşırıq alıblar.

Vicdansızlıq o həddədir ki, onlar hətta işğalçı Ermənistan qoşunlarının Azərbaycandan çıxarılmasını tələb edən BMT Təhlükəsizlik Şurasının (TŞ) məlum dörd qətnaməsini də görməzdən gələrək və yüz minlərlə azərbaycanlının Ermənistan tərəfindən törədilmiş etnik təmizləmə siyasətinin qurbanı olması faktına qəsdən göz yumaraq Ermənistanın onilliklər boyu davam etmiş işğalçı siyasətinə və dəhşətli müharibə cinayətlərinə haqq qazandırmaq üçün öz oxucu və tamaşaçı auditoriyasında yanlış fikir formalaşdırır və keçmiş münaqişənin, guya, dini motivli münaqişə olduğunu iddia edirlər. “Deutsche Welle” də eyni sərsəm iddia ilə çıxış edib və bununla da ictimai rəydə məqsədli surətdə çaşqınlıq yaratmağa çalışıb.

Həqiqətləri bu cür açıq şəkildə təhrif etmək, dezinformasiya yaymaq “Deutsche Welle” kimi nüfuzlu media qurumu üçün rüsvayçılıqdır. Qərəzsiz və obyektiv jurnalistika standartlarını, peşə etikasını dünya erməniçiliyinin murdar maraqlarına qurban vermək olmaz. “Deutsche Welle” bu prinsiplərə də hörmət etmirsə, heç olmasa, öz izləyicilərinə, tamaşaçılarına və nəhayət, alman xalqına biraz sayğı ilə yanaşsın. Axı sıravi almanlar ödədikləri vergiləri “Deutsche Welle”nin onlara yalanları həqiqət kimi sırımağı üçün ödəmir.

Əlisahib Hüseynov,
Azərbaycan Həmrəylik Komitəsinin sədri