Gərginlik PİK HƏDDƏ: ABŞ F-35-ləri Yaxın Şərqə GÖNDƏRDİ

ABŞ Yaxın Şərqə beşinci nəsil “F-35” qırıcı təyyarələrinin bir qrupunu yerləşdirib.

Musavat.com xəbər verir ki, bu barədə “Military Times” nəşri ABŞ Konqresindəki mənbələrə istinadən məlumat yayıb.

Məlumatda bildirilir ki, ABŞ müdafiə naziri Pit Heqset qırıcıların İordaniyaya göndərilməsi barədə göstəriş verib, lakin göndərilən təyyarələrin sayı açıqlanmayıb.

Çərşənbə günü Pentaqonun sözçüsü Şon Parnell bildirib ki, ABŞ Yaxın Şərqdəki hərbi mövcudluğunu gücləndirmək üçün əlavə qüvvələr göndərir. Bu qərar Yəməndəki husilərə qarşı kütləvi hava zərbələri fonunda verilib.

Daha əvvəl ABŞ 124-cü milli qvardiya aviaqanadına məxsus “A-10 Thunderbolt II” hücum təyyarələrini Yaxın Şərqdəki bazalara göndərib. Həftə sonu Aydahodan göndərilən uçuşların sayı barədə məlumat verilməyib.

Bundan əlavə, Pentaqon Hind okeanında yerləşən Böyük Britaniyanın “Dieqo-Qarsiya” adasındakı bazaya ümumilikdə 7 strateji “B-2A Spirit” strateji gizli bombardmançı yerləşdirib. ABŞ Hərbi Hava Qüvvələrinin cəmi 19 belə təyyarəsi var.

“NBC News”un məlumatına görə, ABŞ müdafiə naziri Yaxın Şərqə iki “Patriot” və bir “THAAD” raketdən müdafiə batareyasının göndərilməsi barədə göstəriş verib. Bu sistemlər Fars körfəzində, Qətər və BƏƏ-də yerləşdiriləcək.

Yaxın Şərqə həmçinin “USS Carl Vinson” atom aviadaşıyıcısının rəhbərlik etdiyi aviadaşıyıcı zərbə qrupu göndərilir. Bu qüvvə “USS Harry Truman” aviadaşıyıcısının husilərə qarşı apardığı əməliyyatları dəstəkləyəcək.

Müdafiə naziri ABŞ-ın Yəməndəki husilərə qarşı kütləvi hava zərbələri endirmək qərarından sonra bölgəyə ikinci aviadaşıyıcının göndərilməsi barədə əmr verib. Gəmi iki həftə ərzində bölgəyə çatacaq.

Hazırda Qırmızı dənizdə olan “USS Harry Truman” aviadaşıyıcısının göyərtə aviasiyası 15 mart tarixindən etibarən ABŞ prezidenti Donald Trampın əmri ilə husilərə qarşı genişmiqyaslı hava hücumları həyata keçirir.

Hər iki aviadaşıyıcı ən azı bir-iki ay bölgədə qalacaq.