Rusiyanın Yaponiya və Cənubi Koreya ilə bağlı dəhşətli planı üzə çıxdı

Rusiya ordusu potensial müharibə üçün Yaponiya və Cənubi Koreyada ilk vuracağı hədəflərin ətraflı siyahılarını hazırlayıb.

Musavat.com xəbər verir ki, məlumatı məxfi sənədlərə istinadən “Financial Times” yayıb.

Məlumata görə, ümumilikdə zərbə planları 160 obyekti – atom elektrik stansiyaları və digər mülki infrastrukturu, həmçinin yolları, körpüləri və zavodları əhatə edir.

Qeyd olunur ki, sənədlər əsasən 2008-2014-cü illər arasında ölkənin şərq sərhədində baş verə biləcək münaqişə üçün zabitlərin hazırlanmasına həsr olunmuş 29 gizli Rusiya hərbi faylından götürülüb və hələ də Rusiyanın strategiyası üçün aktual hesab olunur:

“Qərb mənbələrinin FT-yə təqdim etdiyi sənədlər Moskvanın şərq cinahının vəziyyəti ilə bağlı kəskin narahatlığını vurğulayır. Rusiya hərbi planlaşdırıcıları ölkənin şərq sərhədlərinin NATO ilə istənilən müharibədə müfafiəsiz olacağından və ABŞ onun və regional müttəfiqlərinin hücumlarına məruz qalacağından qorxurlar”.

Qeyd olunur ki, Rusiyanın hədəf siyahısında ilk 82 obyekt Yaponiya və Cənubi Koreya silahlı qüvvələrinin mərkəzi və regional komanda məntəqələri, radar qurğuları, hava bazaları və hərbi dəniz obyektləri kimi hərbi obyektlərdir.

Qalanları mülki infrastrukturdur, o cümlədən Yaponiyadakı avtomobil və dəmir yolu tunelləridir – məsələn, Honsyu və Kyushu adalarını birləşdirən Kanmon tuneli. Enerji infrastrukturu da prioritetdir, siyahıda 13 elektrik stansiyası, məsələn, Tokaj nüvə kompleksi, eləcə də yanacaq emalı zavodları var.

Cənubi Koreyada əsas mülki hədəflərikörpülərdir, lakin siyahıya Pohang polad zavodu və Busandakı kimya zavodları kimi sənaye sahələri də daxildir.

İlk təqdimatın çox hissəsi X-101 raketlərindən istifadə edilən hipotetik zərbənin necə baş verə biləcəyinə həsr olunub:

“Slaydlar Rusiyanın hədəflərin siyahısını necə diqqətlə seçdiyini göstərir. Cənubi Koreyanın iki komanda-nəzarət bunkerinə dair qeyd onların müdafiəsini yarmaq üçün tələb olunan qüvvənin təxminlərini təqdim edir. Siyahılar həmçinin obyektlərin gücü, ölçüsü və potensialı kimi digər detalları da göstərir”.

Qeyd olunur ki, Rusiyanın planları onun raket sistemlərinə inamdan xəbər verir. Yaponiyadakı Okuşirito radar bazasına qarşı hipotetik missiya tək Tu-160 ağır bombardmançı təyyarəsindən buraxılan 12 X-101 raketinin istifadəsini əhatə edir. Sənəddə hədəfin məhv edilməsi ehtimalı 85 faiz qiymətləndirilir.

Yaponiya və Cənubi Koreya ilə bağlı ikinci təqdimat Rusiyanın öz qonşularının hava hücumundan müdafiə vasitələrini müntəzəm sınaqdan keçirmək məqsədlərini açıqlayır.

Hesabatda 2014-cü il fevralın 24-də Yaponiya və Cənubi Koreyanın hava hücumundan müdafiə vasitələrini sınaqdan keçirmək üçün göndərilən bir cüt Tu-95 ağır bombardmançı təyyarəsinin missiyası qısa şəkildə təsvir edilib. Dosyeyə görə, Rusiya bombardmançıları Uzaq Şərqdəki Ukrainkadakı Uzaqmənzilli Aviasiya Komandanlığının bazasından havaya qalxaraq cavabı qeydə almaq üçün Cənubi Koreya və Yaponiya üzərində 17 saatlıq uçuş həyata keçiriblər.

Qeyd olunur ki, 39 təyyarənin iştirakı ilə 18 müdaxilə edilib. Ən uzunu, rus pilotlarının dediyinə görə, “silahlı olmayan” bir cüt Yapon F4 Phantomunun 70 dəqiqəlik müşayiəti idi. Yalnız yeddi ələ keçirmə qırıcılar tərəfindən hava-hava raketləri ilə həyata keçirilib.

Qeyd edək ki, Rusiya hazırda Şərq qonşuları üçün tərtib etdiyi planı Ukraynada həyata keçirir: enerji istehsalı və sənaye müəssisələrini dağıdır.