NATO baş katibi Mark Rutte Zelinskinin üzünə: “Kiyev üçün sülh şərtləri…”

Musavat.com xəbər verir ki, NATO-nun baş katibi Mark Rutte Kiyev üçün gələcəkdə baş tuta biləcək sülh danışıqlarının şərtlərinin indidən yaradılmasının vacibliyini vurğulayıb.

Rutte bu açıqlamanı Brüsseldə Ukrayna Prezidenti Vladimir Zelenski ilə birgə keçirdiyi mətbuat konfransında səsləndirib.

Baş katib bildirib ki, Ukrayna sülh danışıqlarına qərar verdiyi zaman ən əlverişli mövqedə olmalıdır:
“Bunun üçün hava hücumundan müdafiə sistemləri və tədarük edə biləcəyimiz digər silahların çatdırılması üçün bütün lazımi addımları atmalıyıq,” – deyə Rutte əlavə edib.

Rutte həmçinin Ukrayna iqtisadiyyatının indiki vəziyyətdə və sülh əldə edildikdən sonra dəstəklənməsinin zəruriliyini vurğulayıb. NATO baş katibi Ukrayna üçün Ukraynalı istehsalçılardan silahların alınması təşəbbüsünü dəstəklədiyini və bunun Ukrayna iqtisadiyyatına müsbət təsir edəcəyini bildirib.

Zelenskinin Brüssel görüşləri

Zelenski Brüsselə Avropa İttifaqı liderləri, Avropa Komissiyası və Avropa Şurası rəhbərləri ilə görüşmək üçün səfər edib. Bu görüşlərdə əsas diqqət Ukraynaya dəstək və gələcək sülh danışıqları üçün addımların müzakirəsinə yönəlib.

Rusiyanın mövqeyi

Rusiya isə Qərbin Ukraynaya silah tədarükünün münaqişənin həllini çətinləşdirdiyini və NATO ölkələrinin birbaşa münaqişəyə cəlb olunduğunu bildirir. Rusiya Xarici İşlər naziri Sergey Lavrov bəyan edib ki, Ukraynaya göndərilən hərbi texnika və silah Rusiya üçün legitim hərbi hədəf olacaq.

Lavrov, ABŞ və NATO-nun yalnız silah göndərməklə deyil, həm də Böyük Britaniya, Almaniya, İtaliya və digər ölkələrin ərazisində Ukrayna hərbi personalını hazırlamaqla münaqişədə birbaşa iştirak etdiyini vurğulayıb.

Kreml də Ukraynaya silah göndərilməsinin sülh danışıqlarına mane olduğunu və münaqişəni daha da gərginləşdirdiyini bəyan edib. Kreml rəsmiləri Qərbin bu addımlarının müzakirələrə mənfi təsir göstərəcəyini bildiriblər.