Suriyada bütün hərbçilər üçün amnistiya elan edildi

Suriyadakı müxalifət koalisiyası keçmiş prezident Bəşər Əsədin hakimiyyəti dövründə hərbi xidmətə çağırılan bütün hərbçilər və çağırışçılara amnistiya elan edib.

Musavat.com-un məlumatına görə, müxalifət qüvvələri tərəfindən yaradılmış Hərbi Əməliyyatlar İdarəsi bəyanat yayımlayaraq bütün hərbçilərə təhlükəsizlik təminatını verib.

Bəyanatda qeyd olunub:

“Hərbi Əməliyyatlar İdarəsi bütün hərbçilər və çağırışçılar üçün ümumi amnistiya elan edib. Onların təhlükəsizliyinə zəmanət verilir. Onlara hər hansı zərər vurmaq və ya zorakılığa məruz qoymaq qəti qadağandır”.

Bu addım, ölkədə uzun müddət davam edən daxili münaqişənin aradan qaldırılması və keçid dövrünün daha inklüziv şəkildə idarə olunması üçün atılmış mühüm bir addım kimi qiymətləndirilir.

Xatırladaq ki, ötən həftə müxalifət qüvvələri paytaxt Dəməşqin nəzarətini ələ keçirdiklərini və keçid hakimiyyəti formalaşdırdıqlarını bəyan etmişdilər. Müxalifətin bu addımları, Suriyada yeni bir siyasi mərhələnin başlanğıcı kimi görülür.

Beynəlxalq ictimaiyyət Suriyadakı bu dəyişiklikləri diqqətlə izləyir və münaqişənin sülh yolu ilə həll olunmasına dair ümidlərini ifadə edir.