Yaponiyadan Rusiyaya doğru NÖVBƏTİ ADDIM

“Yaponiya hökuməti Rusiya ilə ərazi problemini həll etmək və sülh müqaviləsi bağlamaq öhdəliyinə sadiqdir”.

Musavat.com xarici mediaya istinadən xəbər verir ki, bu barədə Yaponiyanın baş naziri Siqeru İsiba parlamentdə çıxışı zamanı bildirib.

“Yaponiya-Rusiya münasibətləri gərgin vəziyyətdədir, lakin ölkəmiz ərazi probleminin həlli və sülh müqaviləsinin bağlanması istiqamətində öz kursunu davam etdirəcək”, – baş nazir deyib.

Xatırladaq ki, Moskva və Tokio İkinci Dünya müharibəsindən sonra sülh sazişinin hazırlanması üçün danışıqlar aparır. Bunun üçün əsas maneə Kuril adalarının cənub hissəsinə aid hüquqlarla bağlı fikir ayrılıqlarıdır. Müharibə başa çatdıqdan sonra bütün arxipelaq Sovet İttifaqının tərkibinə daxil edildi, lakin Yaponiya İturup, Kunaşir, Şikotan və bir qrup kiçik məskunlaşmamış adaların mülkiyyəti ilə bağlı mübahisə edir.

Rusiya Xarici İşlər Nazirliyi müvafiq beynəlxalq hüquqi bazaya malik olan bu ərazilər üzərində Rusiyanın suverenliyinin şübhəsiz olduğunu dəfələrlə vurğulayıb. Tokionun Ukraynadakı vəziyyətlə bağlı anti-Rusiya sanksiyaları tətbiq etməsindən sonra Rusiya sülh müqaviləsi məsələsində Yaponiya ilə məsləhətləşmələri dayandırıb. Moskva, həmçinin, Kuril adalarının cənubunda birgə iqtisadi fəaliyyətlərin yaradılması ilə bağlı Tokio ilə danışıqlardan geri çəkilib və sektor dialoqunda Yaponiyanın Qara Dəniz İqtisadi Əməkdaşlıq Təşkilatının tərəfdaşı statusunun uzadılmasına mane olub.