“Hizbullah”ın yeni baş katibi seçildi – Naim Qasimi KİMDİR…
Livanın “Hizbullah” hərəkatı İsrail hava hücumunda öldürülən baş katib Həsən Nəsrullahın yerinə Naim Qasimini seçdiyini açıqlayıb.
Musavat.com xəbər verir ki, bu barədə “Reuters” agentliyi məlumat yayıb.
Təşkilat yazılı açıqlamasında qeyd edib ki, şura 71 yaşlı N.Qasimini baş katib olmaq üçün müəyyən edilmiş mexanizmə uyğun olaraq seçib. O, 1991-ci ildə silahlı qrupun o vaxtkı baş katibi Abbas əl-Musavi tərəfindən “Hizbullah”ın sədr müavini təyin edilib. Abbas əl-Musavi isə növbəti il İsrail helikopterinin hücumu nəticəsində öldürülüb.
Musavat.com Naim Qasiminin dosyesini təqdim edir:
“Hizbullah”ın qurucularından olan Şeyx Naim Qasimi Livan Universitetinini İlahiyyat fakültəsini bitirib və Məhəmməd Hüseyn Fəzlullahın tələbəsi olub.
Naim Qasimi “Hizbullah”ın aparıcı fiqurlarından biridir və uzun müddət təşkilatda baş katibin müavini vəzifəsini icra edib. O, “Hizbullah”ın sabiq lideri Seyid Həsən Nəsrullahın ən yaxın müttəfiqlərindən biri kimi tanınıb və Livanda, xüsusilə də şiə cəmiyyətində böyük nüfuza malikdir.
Naim Qasimi həm hərbi, həm də siyasi sahədə “Hizbullah”ın siyasətlərini formalaşdıran mühüm şəxslərdən biridir.
Siyasi fəaliyyət: Naim Qasimi “Hizbullah”ın ideologiyasını yaymaq və onun regional və beynəlxalq münasibətlərini koordinasiya etməkdə əhəmiyyətli rol oynayır. O, Livanda təşkilatın siyasi qanadının güclənməsində mühüm fəaliyyət göstərir.
İranla əlaqələr: O, “Hizbullah”ın İranla olan sıx münasibətləri çərçivəsində Tehranla koordinasiyanı və dəstəyi gücləndirməyə çalışır.
Naim Qasiminin beynəlxalq arenada əsasən “Hizbullah”ın siyasi və hərbi fəaliyyətlərini təşviq etməklə tanınan bir şəxs kimi xüsusi rolu var. Onun fikirləri və çıxışları Livan daxilində və bölgədəki siyasi hadisələrə təsir edir, xüsusilə də təşkilatın Livan siyasətindəki təsir gücünü artırır.