Rusiya Ukrayna ərazisindən qaz tranzitindən imtina etmir – Putin

Rusiya qazının Ukrayna vasitəsilə Avropaya nəqlinin perspektivləri Ukraynaya maliyyə və hərbi yardıma yönəlmiş avropalı alıcılardan asılıdır.

Bunu Rusiya prezidenti Vladimir Putin Şərq İqtisadi Forumunun plenar iclasında deyib.

Qeyd edək ki, “Qazprom”un Rusiya qazının Ukrayna ərazisindən tranzitinə dair uzunmüddətli müqaviləsi 2024-cü ildə başa çatır və Kiyev onu yeniləmək istəmədiyini bəyan edib: “Ukraynaya gəlincə, biz bu tranzitdən imtina etmirik, çünki biz və Qazprom şirkəti uzunmüddətli müqavilələrimiz olan müştərilərimiz qarşısında bütün öhdəliklərimizi yerinə yetirmək niyyətindəyik. Bu ilin dekabrın 31-də başa çatan tranzit müqaviləsi var, amma Ukrayna bu tranzitdən imtina edərsə, biz onları məcbur edə bilmərik. Avropadakı əsas istehlakçılarımız, görünür, bunu etmək istəmirlər, baxmayaraq ki, onlar Ukraynaya hərtərəfli yardım edir, dəstək verirlər – hərbi, maliyyə və nə olursa olsun”.

Putin əlavə edib ki, Rusiya Avropanın mövqeyi fonunda dünyanın digər regionlarına tədarükünü tədricən artıracaq. Putin əmindir ki, Rusiya qazının ixrac həcmi tədricən bərpa olunacaq: “Ukrayna bizim tranzitimizdən imtina edir, bu isə o deməkdir ki, Avropaya gələn qazın həcmi azalacaq, onlar digər marşrutlarla, xüsusən də “Mavi axın”dan keçəcək”.

Putin onu da bildirib ki, Avropaya qaz nəqlinin azalması Rusiyanın gəlirlərini azaldacaq, amma daxilə daha çox qaz satılmasını təmin edəcək.