Yeni Kaledoniya Konqresinin nümayəndə heyəti Azərbaycanda olub – FOTOLAR
Yeni Kaledoniya Konqresinin İnfrastruktur, Məkan Planlaması, Davamlı İnkişaf, Enerji, Nəqliyyat və Kommunikasiyalar üzrə Komitəsinin sədri Neysselin Omayranın rəhbərlik etdiyi nümayəndə heyəti Azərbaycana səfəri çərçivəsində Bakıda yerləşən Müqəddəs Məryəm Katolik Kilsəsini ziyarət edib.
Roma Katolik Kilsəsinin Azərbaycandakı Apostolprefekturasının ordinarisi Yepiskop Vladimir Fekete qonaqlara kilsənin yaranma tarixindən danışıb və tanışlıq ekskursiyası təşkil edib.
Nümayəndə heyətinə məlumat verilib ki, Bakı şəhərindəki Müqəddəs Məryəm kilsəsində mərasimlər üç dildə – Azərbaycan, ingilis və rus dillərində həyata keçirilir.
Yeni Kaledoniya Konqresinin İnfrastruktur, Məkan Planlaması, Davamlı İnkişaf, Enerji, Nəqliyyat və Kommunikasiyalar üzrə Komitəsinin sədri Neysselin Omayranın rəhbərlik etdiyi nümayəndə heyəti Bakıda yerləşən Qoşulmama Hərəkatı Gənclər Təşkilatının mənzil-qərargahında da olublar.
Qonaqlara qurumun fəaliyyəti haqqında məlumat verilib, həmçinin qərargahla tanışlıq olub.
Bundan başqa, nümayəndə heyəti Bakıda Müqəddəs Məryəm Katolik Kilsəsini ziyarət edib, həmçinin Azərbaycan Dillər Universitetində olublar.
Neysselin Omayranın rəhbərlik etdiyi nümayəndə heyəti aprelin 17-də həmçinin Heydər Əliyev Mərkəzində olub.
İctimai Rəy AZƏRTAC-a istinadən xəbər verir ki, qonaqlara dünya memarlığının nadir incilərindən sayılan Mərkəz haqqında məlumat verilib. Qeyd olunub ki, Mərkəzin fəaliyyəti Azərbaycan xalqının Ümummilli Lideri Heydər Əliyevin dövlətçilik fəlsəfəsinin, azərbaycançılıq ideologiyasının və Ulu Öndərin irsinin dərindən öyrənilməsinə və tədqiq edilməsinə yönəlib.
Bildirilib ki, Mərkəzdəki Heydər Əliyev Muzeyində Ulu Öndərin fəaliyyət konsepsiyasının müxtəlif aspektləri virtual şəkildə təqdim olunur.
Qonaqlar Ulu Öndərin Azərbaycana rəhbər olduğu dövrlərdə – 1969-cu ildən 2003-cü ilədək rəsmi istifadəsində olan avtomobillərə baxıblar.
Ümummilli Liderin həm sovet hakimiyyəti dövründə, həm də müstəqillik illərində həyata keçirdiyi fəaliyyət konsepsiyasının müxtəlif dövrlərini əks etdirən eksponatlar, fotoşəkillər və multimedia zalı qonaqların böyük marağına səbəb olub.
“Azərbaycan inciləri” sərgisi ilə də tanış olan nümayəndə heyətinin üzvlərinə məlumat verilib ki, ekspozisiyada ölkəmizin tükənməz təbii sərvətləri, çoxəsrlik tarixi, mədəni irsi ilə bağlı nadir eksponatlar nümayiş etdirilir. Burada qədim sənətlərin, o cümlədən Azərbaycan xalçaçılıq məktəbinin nadir nümunələri sərgilənir, qədim çalğı alətlərimiz orijinal şəkildə – səsli formada təqdim olunur. Qeyd olunub ki, bu guşədə Azərbaycan milli geyimləri, qədim sikkələr də nümayiş etdirilir.
Yeni Kaledoniya Konqresinin nümayəndə heyəti Azərbaycanın qədim musiqi alətləri ilə də tanış olub.
Heydər Əliyev Mərkəzi ilə tanışlıq qonaqlarda xoş təəssürat doğurub.
