Ohanyan Ordumuzun zərbəsi ilə qovulduğunu “unutdu”

Ermənistanla Azərbaycan arasında güc baxımından həmişə Bakının xeyrinə disbalans olub.

İctimai Rəy xəbər verir ki, bu sözləri “Ermənistan” blokunun parlament fraksiyasının rəhbəri, sabiq müdafiə naziri (2008-2016) Seyran Ohanyan deyib.

O bildirib ki, bu “disbalans” daim eyni vəziyyətdə qalıb:

“Azərbaycanın iqtisadi vəziyyətini, imkanlarını nəzərə alsaq, şübhəsiz ki, onlar daha çox silah aldılar, amma bizim müdafiə sistemimiz, müdafiə vasitələrimiz var idi. 44 günlük müharibədə Ermənistan ordusu və “Qarabağ müdafiə ordusu” bizi qorumaq gücündə idi. Sadəcə olaraq, hər şeyi normal təşkil etmək lazım idi”.

Qeyd edək ki, keçilməz sayılan “Ohanyan səddi”ni 2016-cı ildə Azərbaycan Ordusu bir istiqamətdə 40 dəqiqəyə, 44 günlük savaşda isə bütün cəbhə boyu 2 saatda darmadağın etmiş və ildırım sürəti ilə düşmənin içərisinə girmişdi. Məhz öyündüyü, heç vaxt keçilməsi mümkün olmadığını iddia etdiyi “Ohanyan səddi” 40 dəqiqəyə darmadağın edildiyi üçün Seyran Ohanyan 2016-cı ildə müdafiə naziri vəzifəsindən qovulmuşdu.