Tanınmış vəkil Əvəz Zeynallını ifşa etdi – Sensasion faktlar

Tanınmış vəkil Elçin Sadıqov həbsdə olan jurnalist Əvəz Zeynallının onun barəsində dünənki məhkəmə prosesində səsləndirdiyi fikirlərə münasibət bildirib.

Ictimairey.az xəbər verir ki, vəkil bu haqda feysbuk hesabında paylaşım edib.

“Bu müddət ərzində dinmədim, səbr etdim. Düşündüm ki, yoldaşı nə yazmasından, danışmasından asılı olmayaraq gözləyim, görüm Əvəz Zeynallı nə deyir. Məni tanıyanlar bilir bütün görüşlərimdə Ə.Zeynallının həbsinin siyasi olduğunu bildirmişəm. Amma, bu gün Ə.Zeynallı məni özü ilə birlikdə görmək istədiyini bildirib.

Əvəz Zeynallıdan R.Məmmədov və onun ailə üzləri barəsində yazmamağı xahiş edəndə Əvəz məndən nə qədər pul qazandığımı, dolanışığımın necə olduğunu soruşdu. Allah şükr etdim və bunun məsələyə nə aidiyyətinin olduğunu soruşdum. O isə bildirdi ki, sən dolanırsan mən də dolanmaq istəyirəm. R.Məmmədovun ailəsinə dedim ki, bu yaxşı adam deyil, 14 il pulsuz vəkillik etmişəm, indi bir şeyi xahiş edəndə pul istəyir, bununla ümumiyyətlə danışmayaq. O gündən sonra Əvəz dayanmadı hər gün Məmmədova və ailə üzvlərinə qarşı hədyanlar danışmağa başladı. Əvəzin dayanmadığını gördük, hətta 26 avqust 2022-ci il tarixli çıxışında Əvəz adımı çəkməsə də Məmmədovun müdafiə işinə də ilişmişdi. Məcbur olduq Əvəzlə danışmağa. Əvəz mənə fantastik məbləğ demişdi. Sonra razılaşdıq. Pulu aldı. Cəmi 4 gün sonra yenə hədyanlar danışdı. Mən Əvəzin bunu mənə edəcəyini, yəni pul alıb yenə danışacağını, karusel edəcəyini heç gözləməzdim.

Bu da Məmmədovların haqlı narazılığına səbəb oldu. Həmin gün narazılıq olmasın deyə öz pulumdan Məmmədovların pulunu geri qaytardım. Və sonra mənə dedi ki, ona pul yox sənədlər verdiyimi deyim. Özü də elə dedi. Sənəd adı gələn kimi, ikimizi də tutdular. Halbuki, CM-nin 312-ci maddəsinin qeydini bilən hər kəs bilir ki, mənim əməlimdə heç vaxt cinayət tərkibi olmayıb. Məni vəsatətə görə həbs etmişdilər.

Əvəzə qarşı müxtəlif ittihamlar və çoxlu epizodlar var. Bəlkə də maddələrinin sayını özü də bilmir. Amma yenə də mənim adımı çəkib şou düzəldir. Onda belə çıxır ki, o biri ittihamların hamısı düzdür, ona görə Əvəz onları pərdələməyə çalışır”, – deyə Elçin Sadıqov qeyd edib.

Bundan əvvəl Əvəz Zeynallının həyat yoldaşı sosial şəbəkə hesabında vəkili işarələyərək bunları yazmışdı: “Elçin Sadıqov, bu dünyanın borcunu qaytarmayana qədər, o dünyaya getdi yoxdur”.

Qeyd edək ki, Əvəz Zeynallı dünənki məhkəmədə Elçin Sadıqovun onun üzünə durduğunu demişdi: “Mən vəkil Elçin Sadıqovla birlikdə həbs olunmuşam. İttiham verilib ki, mən onunla birlikdə rüşvət almışam. Niyə o azadlıqdadır, mən həbsdə? Axı mənə ittiham onunla birlikdə verilib? Biz bir ittihamla saxlanılmışıq, həbs edilmişik. Deyim, nəyə görə. Elçin Sadıqov mənim üzümə durdu deyə azadlığa buraxıldı”.