Ermənistan İranla əlaqələri gücləndirir

Tehranda səfərdə olan Ermənistan xarici işlər nazirinin müavini Mnatsakan Səfəryan iranlı həmkarı Əli Baqeri Kani ilə görüşüb və bu görüşdə tərəflər ikitərəfli münasibətlər və regional hadisələri müzakirə edib, fikir mübadiləsi aparıblar.

Modern.az İran KİV-lərinə istinadən xəbər verir ki, xarici işlər nazirlərinin müavinləri görüşdə Cənubi Qafqaz regionunda sülh və sabitliyin bərqərar olması və regiondaxili əməkdaşlığın gücləndirilməsinin zəruriliyini vurğulayıblar.

Baqeri Kani isə öz növbəsində İran və Ermənistan arasında əməkdaşlığın hərtərəfli genişləndirilməsini iki xalqın mənafeyinə və Cənubi Qafqaz regionunda sabitlik və təhlükəsizliyin möhkəmləndirilməsinin xeyrinə adlandırıb. O, bu məsələdə İslam Respublikasının qətiyyətini vurğulayıb, qeyd edib ki, İran bu əməkdaşlığı daha da genişləndirəcək.

İran İslam Respublikasının ölkəsinin ərazi bütövlüyünü dəstəkləməkdə tutduğu mövqeni yüksək qiymətləndirən Səfəryan Ermənistanın iki dövlət arasında, xüsusilə də iqtisadi və ticarət sahələrində əməkdaşlığı inkişaf etdirmək iradəsinə işarə edib. O, iki ölkə arasında əlaqələrin daha da inkişaf edəcəyinə ümid etdiyini bildirib.