Azərbaycanda iqtisadiyyatın bütün sahələri kimi pambıqçılıq çox böyük sürətlə inkişaf edir. Təsadüfi deyil ki, Azərbaycan artıq dünyada pambıqçılıq ölkəsi kimi də tanınmağa başlayıb. Azərbaycanda illik pambıq tədarükü bir milyon tona çatdırılacaq.
Bu fikirləri açıqlamasında Türkiyədə fəaliyyət göstərən “Do Cotton Group” şirkətinin rəhbəri Mehmət Doğan bildirib.
“Do Cotton Group”nun Azərbaycandan çox həcmdə pambıq alıb Türkiyə və dünyada bazarlara çıxaran şirkətlər sırasında olduğunu diqqətə çatdıran Mehmət Doğan deyib ki, rəhbərlik etdiyi şirkətin pambıq ticarəti, tədarükü və emal texnologiyalarının hazırlanması sahəsində böyük imkanları var. Bu çərçivədə “Do Cotton Group” şirkəti Azərbaycanda növbəti pambıq təmizləmə zavodunu Ağcabədi rayonunda tikir. Tam şəkildə Türkiyə istehsalı olan texnologiya və avadanlıqlar bu ilin pambıq yığımı mövsümünə qədər təyinat məntəqəsində montaj olunacaq. İstehsal olunan texnologiya və avadanlıqlar bir sıra keyfiyyət göstəricilərinə malikdir.