Sibirdən Uzaq Şərqə: Rusiyada deportasiya edilmiş ukraynalıların olduğu 66 düşərgə tapılıb – XƏRİTƏ

Rusiyada zorla deportasiya edilmiş ukraynalıların olduğu ən azı 66 düşərgə aşkarlanıb. Onların bir çoxu evlərindən minlərlə kilometr uzaqlarda, ölkənin ən ucqar guşələrində, o cümlədən Sibirdə, Qafqazda, Arktika Dairəsində və Uzaq Şərqdə yerləşir.

Bu barədə Britaniyanın “İnews” nəşrinin araşdırmasında deyilir.

Jurnalistlərin müəyyən etdiyi kimi, bu düşərgələrin 38-də 6250 nəfər var və onların üçdə birindən çoxu Mariupol sakinləri üçün yaradılıb. Düşərgələrin hər birində orta hesabla 162 nəfər yaşayır.

Inews təhlili göstərir ki, Rusiya sərhədi keçdiyi deyilən insanların ümumi sayını yerləşdirmək üçün, ən azı 6000 düşərgəyə ehtiyac duya bilər. Medianın məlumatına görə, 808 min ukraynalı qanunsuz olaraq Rusiya Federasiyasına aparılıb, onlardan 153 mini uşaqdır.

Rusiya mediası Uzaq Şərqdə həyatı “seçdiklərini” iddia etsə də, çıxmaq istəyənlər demək olar ki, mümkün olmayan bir vəzifə ilə üzləşirlər. Onlar sözün əsl mənasında konsentrasiya düşərgəsindədirlər: əşyasız, telefonsuz, pulsuz və sənədlərsiz.

“İnsanlarımızı isti Azov dənizindən 9,6 min kilometr məsafədə dünyanın sonuna apardılar, burada ən isti ay avqustun temperaturu +21 dərəcədir”. Mariupol merinin müşaviri Petr Andryuşşenko bildirib.

Ali Radanın insan hüquqları üzrə komissarı Lyudmila Denisova hazırda Rusiya Federasiyasında olan və Ukraynaya və ya Avropa ölkələrinə necə getməyi bilməyən Ukrayna vətəndaşlarını Rusiya sərhədindən Narva şəhərinə keçid məntəqəsindən istifadə etməyə çağırıb.