SON XƏBƏR: Türkiyə Qara dənizdəki qaz ehtiyatlarını təxmin edib

Türkiyənin keçmiş baş naziri: 45 il ərzində Qara dənizdəki qaz ehtiyatları dünya ehtiyaclarını ödəyəcək

Türkiyə Qara dənizdəki qaz ehtiyatlarının 45 il ərzində dünyanın tələbatını ödəyə biləcəyini bildirib. Bunu Türkiyənin hakim Ədalət və İnkişaf Partiyasının (AKP) sədr müavini, keçmiş baş nazir Binəli Yıldırım deyib.

“Qara dənizin təbii qaz ehtiyatları hazırda 540 milyard kubmetr qiymətləndirilir. Bu hələ başlanğıcdır, daha çox olacaq. Qara dəniz 45 il ərzində dünyanın qaz ehtiyacını ödəyə bilir”, – Yıldırım bildirib.

Öz növbəsində Türkiyənin enerji və təbii sərvətlər naziri Fatih Dönməz “Kriter”ə müsahibəsində bildirib ki, ölkə bu yatağın istismarına 2023-cü ilin əvvəlində başlamaq və hasilatı sutkada 40 milyon kubmetrə çatdırmaq niyyətindədir.

Hakimiyyət hələ 2020-ci ildə Qara dənizdə böyük qaz ehtiyatlarının aşkar edildiyini bildirmişdi. Sakarya yatağının ehtiyatları 400 milyard kubmetrdən çox qiymətləndirilirdi.

Apreldə məlum olub ki, Türkiyə Qara dənizdə 540 milyard kubmetr qazın hasilatı və nəqlinə təxminən on milyard dollar sərmayə qoymağı planlaşdırır.

Türkiyə prezidenti Rəcəb Tayyib Ərdoğanın fərmanı ilə Sakarya yatağı layihəsi dövlət yardımı əhatəsinə daxil edilib. Ölkə əsasən Rusiyadan qaz idxalından tamamilə asılıdır, lakin yatağın bu idxalı təxminən dörddə bir azaldacağı gözlənilir.