Narahatlıq: Ermənistan-Türkiyə normallaşması Rusiya 102-ci  hərbi bazasını “sıxıb çıxara” bilər

Yanvarın 14-də Moskvada iki ölkənin xüsusi nümayəndələrinin görüşü ilə artıq başlayan Ermənistanla Türkiyə arasında münasibətlərin normallaşması prosesi, qonşu dövlətlər arasında sərhədin açılmasını nəzərdə tutur. Bu baxımdan Ermənistan mediasında və ekspert dairələrində Türkiyə sərhədinə yaxın ərazidə yerləşən və onun mühafizəsinə cavabdeh olan Gümrüdəki 102-ci Rusiya hərbi bazasının gələcək taleyi ilə bağlı sual yaranmağa başlayıb.

İctimairey.az xəbər verir ki, bu gün, yanvarın 25-də “Joqovurd” (“Xalq” müxalifət nəşri) qəzeti Ermənistanın Şirak bölgəsindəki mənbələrə istinadən yazır ki, “məlumat və həyəcanlı xəbərlər almağa davam edilir ki, əgər Ermənistan-Türkiyə münasibətlərinin normallaşması istiqamətində hər şey rəvan getsə, 102-ci bazanın çıxarılması istisna edilmir, çünki buna sadəcə ehtiyac olmayacaq.

Eyni zamanda, nəşr hadisələrin belə inkişaf etməsinə qəti şəkildə şübhə edir, 2010-cu ilin avqustunda imzalanmış ikitərəfli protokolun 2016-cı ildə Birgə Qrupun yaradılması haqqında sazişin bağlanmasına zəmin hazırladığını xatırladır.

Ermənistan və Rusiya Silahlı Qüvvələrinin Baş Qərargahı bildirir ki, Rusiyanın Gümrüdəki hərbi bazası 2044-cü ilə qədər Zaqafqaziya müttəfiqinin ərazisində qalacaq.

Rusiyanın o vaxtkı prezidenti Dmitri Medvedevin Ermənistana dövlət səfəri zamanı, imzalanmış sözügedən protokola əsasən, Rusiya hərbçilərinin Ermənistan ərazisində qalma müddəti nəinki uzadılıb, həm də Moskva Ermənistanın təhlükəsizliyini təkcə Türkiyə ilə sərhəddə deyil, quru və hava sərhədlərinin bütün perimetri ilə  təmin edəcəyinə söz verib.

Xatırladaq ki, yanvarın 14-də keçirilən görüşdən sonra Ankara və İrəvan Ermənistan-Türkiyə arasında normallaşma prosesi çərçivəsində ilk ikitərəfli təmasların müsbət və konstruktiv atmosferdə keçdiyi barədə razılığa gəliblər. “Xüsusi nümayəndələr Ermənistan və Türkiyə arasında dialoq yolu ilə normallaşma prosesi ilə bağlı ilkin fikir mübadiləsi aparıblar. Tərəflər tam normallaşma üçün, ilkin şərt olmadan danışıqları davam etdirməyə razılaşıblar”, – Ermənistan XİN-in bəyanatında deyilir. Oxşar qiymətləndirmələri Türkiyə Xarici İşlər Nazirliyi də səsləndirib. Bir saat yarım davam edən danışıqlarda Türkiyə tərəfini ölkənin ABŞ-dakı keçmiş səfiri Serdar Kılıç, Ermənistan tərəfini isə respublika parlamentinin vitse-spikeri Ruben Rubinyan təmsil edib.