ANAMA-nın azad olunan ərazilərdə aşkarladığı minaların sayı açıqlanıb

Minatəmizləmə Agentliyinin (ANAMA) işğaldan azad olunan ərazilərdə ötən il aşkarladığı minaların sayı açıqlanıb.

Agentliyin İdarə Heyətinin sədri Vüqar Süleymanov bildirib ki, ötən il 6 000 ha ərazinin təmizlənmə öhdəliyi qarşısında minaaxtaranlar 6 201 ha ərazini mina və partlamamış hərbi sursatlardan (PHS) təmizləyərək aidiyyəti üzrə təhvil verib.

Nəticədə, 4 880 ədəd piyada əleyhinə mina, 2 335 ədəd tank əleyhinə mina və 11 205 ədəd PHS aşkar edilərək zərərsizləşdirilib.

Agentlik sədri deyib ki, kənd təsərrüfatı təyinatlı torpaqlar üzrə 1 981 ha, məskunlaşma üçün nəzərdə tutulan ərazilərin təmizlənməsi üzrə 1 373 ha, nəqliyyat infrastruktur layihələri üzrə 1 618 ha, enerji xətlərinin çəkilməsi üçün 586 ha və 644 ha ərazi digər layihələr üzrə təmizlənərək təhvil verilib.