Yenilənib: Qazaxıstan hakimiyyəti qazın qiymətini aşağı salmağa söz verdi 

Xüsusi yaradılmış hökumət komissiyası Qərbi Qazaxıstanda etirazçılara qazın qiymətini aşağı salmağa söz verib.

Bundan əlavə, etirazçılara cavabdehlik daşımayacaqları ilə bağlı təminatlar verilib.

Qazaxıstan prezidenti Kasım-Jomart Tokayev çərşənbə günü, yanvarın 5-də ölkədəki vəziyyətlə bağlı iclas keçirəcək.

Qeyd edək ki, Nur-Sultanda polis maye qazın qiymətinin iki dəfə artırılmasına etiraz edən icazəsiz aksiyanın bir neçə iştirakçısını saxlayıb. Saxlanmalar ölkənin digər bölgələrində də baş verib.

 İctimairey.az xəbər verir ki, yanvarın 2-də Mangistau vilayətinin Janaozen şəhərində avtomobil sahiblərinin başladığı etirazlar bütün ölkəyə yayılıb. Əvvəlcə etirazçılar yanvarın 1-dən litri 60 təngədən 120 təngəyə qalxan maye qazın qiymətinin aşağı salınmasını tələb ediblər. Sosial şəbəkələrdə yayılan məlumata görə, bu gün, yanvarın 4-də artıq Qazaxıstanın 8 rayonunda etiraz aksiyaları keçirilir.