Qazaxıstan parlamenti ölüm hökmünün tam ləğvini təsdiqləyib

Qazaxıstan parlamentinin aşağı palatası – məclis edam cəzası ilə bağlı Cinayət Məcəlləsinə dəyişiklikləri ikinci oxunuşda təsdiqləyib.

İctimairey.az xəbər verir ki, bu barədə Kazinform xəbər verib.

“Ölüm cəzasının tam ləğvi qanunvericilik və məhkəmə-hüquq islahatı haqqında milli qanunvericiliyin beynəlxalq hüquqi öhdəliklərə uyğunlaşdırılmasına, insan hüquqlarının və ən yüksək konstitusiya dəyəri olan yaşamaq hüququnun təmin edilməsinə töhfə verəcək”, – deyə Milli Məclisin komitə sədri Arman Kazaxmetov bildirib.

Kazaxmetov xatırladıb ki, bundan əvvəl Qazaxıstan prezidenti Kasım-Jomart Tokayev Qazaxıstanda ölüm hökmünün “heç bir qeyd-şərtsiz” ləğv edilməsinə çağırıb və Məclis öz qərarı ilə bu kursu təsdiqləyib.

İndi qanun layihəsi Qazaxıstan parlamentinin yuxarı palatası – Senatda təsdiqlənməlidir.

2003-cü ildə Qazaxıstanda ölüm hökmünə moratorium tətbiq edilib. Ölkə 2020-ci ilin sentyabrında ölüm hökmünün ləğvi ilə bağlı beynəlxalq protokola qoşulduğu zaman, ölüm cəzasının ləğvi ilə bağlı öhdəlik götürüb.

Qeyd edək ki, əvvəlcə sənədi BMT-də ölkənin qurumdakı daimi nümayəndəsi imzalayıb, sonra Qazaxıstan prezidenti onu ratifikasiya edib. 2020-ci ilin noyabrında Milli Məclis edamların ləğvi ilə bağlı qanun layihəsini qəbul edib.