Vətən müharibəsinin əfsanəvi döyüşçüsü Sübhan Cəbrayılov
Vətən Müharibəsi Qəhrəmanı Cəbrayılov Sübhan Rahim oğlunun ildönümü ilə əlaqədar Salyan Rayon İcra Hakimiyyəti tərəfindən 19 oktyabr 2021-ci il tarixdə Salyan şəhərində təşkil edilmiş anım mərasimində iştirak etdim. 
Salyan Rayon İcra Hakimiyyətinin başçısı Sevindik Hətəmov, Milli Məclisin deputatı Fəzail Ağamalı, Azərbaycanın xalq artisti Nurəddin Mehdixanlı, Azərbaycanın tanınmış hərbi diktoru və hərbi vətənpərvərlik mahnılarının peşəkar ifaçısı Şəmistan Əlizamanlı, Şəhidin ailəsi, Xüsusi Təyinatlı Qüvvələrin əsgər və zabitləri, rayon ictimaiyyəti və ziyalıların iştirak etdiyi mərasimdə Sübhan Cəbrayılov haqqında çəkilmiş video-çarx nümayiş olundu. Salyan RİH-in təşəbbüsü ilə ekranlaşdırılmış video-çarxı izləyərkən kövrək, duyğulu anlar yaşadıq, göz yaşlarımıza hakim ola bilmədik.
Vətən Müharibəsi Qəhrəmanımızın xatirəsinə həsr edilmiş “Ölməzliyə gedən yol” tamaşasını Salyan Dövlət Kukla Teatrının aktyorları yüksək peşəkarlıqla oynadılar. Düşünürəm ki, burada “oynadılar” ifadəsi yanlışdır. Çünki aktyorların ifası o qədər təbii və o qədər canlı idi ki, sanki tamaşanı deyil, döyüş meydanında baş verən real bir hadisəni izləyirdin… 
Sübhan Cəbrayılovun xatirəsinə həsr edilmiş digər tədbir, onun doğulduğu Marışlı kəndində keçirildi və qəhrəmanımızın adının əbədiləşdirildiyi xatirə kompleksinin açılışı oldu.
Vətən Müharibəsi Qəhrəmanımızın ildönümünü ən yüksək səviyyədə təşkil etmiş Salyan Rayon İcra Hakimiyyətinin başçısı Sevindik Hətəmova, o cümlədən video-çarxı ərsəyə gətirən yaradıcı heyətə, tamaşanı səhnələşdirən Salyan Dövlət Kukla Teatrının kollektivinə dərin təşəkkürlərimi bildirirəm.
Qeyd edim ki, Azərbaycanın suverenliyi uğrunda gedən döyüşlərdə şücaətlər nümayiş etdirmiş Sübhan Cəbrayılov zəfər tariximizi yazan əfsanəvi döyüşçülərimizdən biridir. Azərbaycan Respublikasının Prezidenti, Ali Baş Komandan cənab İlham Əliyevin Sərəncamına əsasən ölümündən sonra bir çox medallarla təltif edilən Sübhan Cəbrayılovun Vətən Müharibəsi Qəhrəmanı adına layiq görülməsi Şəhidlərimizə verilən yüksək dəyərin təzahürüdür.
Vətən müharibəsinin əfsanəvi döyüşçüsü, səninlə bütün Azərbaycan qürur duyur…
Jalə ƏHMƏDOVA Millət Vəkili